O‘zbekistonda dam olish kunlari harorat ko‘tariladi

Respublika hududining katta qismida quruq va kam bulutli ob-havo dam olish kunlarida ham saqlanib turadi, deb xabar bermoqda “O‘zgidromet”.

Faqat Qoraqalpog‘iston Respublikasi va Xorazm viloyatida 17-mart, yakshanba kuni baʼzi joylarda biroz yomg‘ir yog‘ishi mumkin. Respublikaning ayrim joylarida shamol tezligi 15-18 metr/sekundgacha kuchayishi mumkin.

15-mart kuni kunning ikkinchi yarmida harorat 8-13 daraja iliq atrofida bo‘ladi, yakshanba kuni esa havo 15-20 daraja iliqqacha ko‘tariladi.

Shanbadan yakshanbaga o‘tar kechasi respublika bo‘yicha baʼzi joylarda biroz sovuq saqlanib turadi, yakshanba kuni harorat kechasi 2-7 daraja iliqqacha ko‘tariladi. Kechasi va ertalab baʼzi joylarga tuman tushadi.

Dam olish kunlari tog‘larda yog‘ingarchilik kutilmaydi. Qor ko‘chish xavfi saqlanib turadi.

Toshkentda 15—17-mart kunlari yog‘ingarchilik kutilmaydi. Kechasi va ertalab tuman tushishi mumkin. Harorat shanba kuni kechasi 0-2 daraja sovuq, kunduzi 13-15 daraja iliq; yakshanba kuni kechasi 2-4 daraja iliq, kunduzi 16-18 daraja iliq bo‘ladi.