O‘zbekistonda o‘simlik yog‘lari hamda moyli ekinlar urug‘larini qayta ishlashdan olingan yog‘larni eksport qilishga ruxsat beriladi. Bu haqda hukumatning “Moyli urug‘larni qayta ishlovchi korxonalarning eksport salohiyatini oshirish chora-tadbirlari to‘g‘risida”gi qarorida belgilandi.
Hujjatga ko‘ra, xo‘jalik yurituvchi subyektlarga ularning tashkiliy-huquqiy shaklidan qat’i nazar, o‘zlari import qilgan o‘simlik yog‘lari hamda moyli ekinlar (paxta, kungaboqar va soya) urug‘larini qayta ishlashdan olingan o‘simlik yog‘larini belgilangan miqdorlarda eksport qilishga ruxsat beriladi.
Kungaboqar va paxta yog‘i hamda aralash yog‘lardan tashqari boshqa o‘simlik va meva urug‘lari yog‘larini O‘zbekiston bojxona hududidan tashqariga olib chiqish (eksport qilish) bo‘yicha cheklovlar bekor qilinadi.
Mazkur qarorga asosan eksport qilinishi mumkin bo‘lgan o‘simlik yog‘i hajmini aniqlashda xo‘jalik yurituvchi subyektlar tomonidan 2024-yil 1-yanvardan boshlab import qilingan moyli ekinlar urug‘lari va o‘simlik yog‘lari hajmlari inobatga olinadi.
Ushbu hujjat tadbirkorlik subyektlari uchun qulay biznes muhitini yaratish, xususan, xomashyo resurslarini import qilish hisobiga tayyor mahsulotni ichki bozorga va eksportga yo‘naltirish imkonini beradi.
Aholining asosiy turdagi oziq-ovqat mahsulotlari bilan ta’minlanganlik darajasi hamda ichki bozordagi narx barqarorligidan kelib chiqib Iqtisodiyot va moliya vazirligining asoslantirilgan taklifiga ko‘ra, import qilingan o‘simlik yog‘ining 50 foizidan oshmagan miqdorini eskport qilishga ruxsat berish bekor qilinishi mumkin.
Izoh (0)