Ўзбекистонда ўсимлик ёғлари ҳамда мойли экинлар уруғларини қайта ишлашдан олинган ёғларни экспорт қилишга рухсат берилади. Бу ҳақда ҳукуматнинг “Мойли уруғларни қайта ишловчи корхоналарнинг экспорт салоҳиятини ошириш чора-тадбирлари тўғрисида”ги қарорида белгиланди.
Ҳужжатга кўра, хўжалик юритувчи субъектларга уларнинг ташкилий-ҳуқуқий шаклидан қатъи назар, ўзлари импорт қилган ўсимлик ёғлари ҳамда мойли экинлар (пахта, кунгабоқар ва соя) уруғларини қайта ишлашдан олинган ўсимлик ёғларини белгиланган миқдорларда экспорт қилишга рухсат берилади.
Кунгабоқар ва пахта ёғи ҳамда аралаш ёғлардан ташқари бошқа ўсимлик ва мева уруғлари ёғларини Ўзбекистон божхона ҳудудидан ташқарига олиб чиқиш (экспорт қилиш) бўйича чекловлар бекор қилинади.
Мазкур қарорга асосан экспорт қилиниши мумкин бўлган ўсимлик ёғи ҳажмини аниқлашда хўжалик юритувчи субъектлар томонидан 2024 йил 1 январдан бошлаб импорт қилинган мойли экинлар уруғлари ва ўсимлик ёғлари ҳажмлари инобатга олинади.
Ушбу ҳужжат тадбиркорлик субъектлари учун қулай бизнес муҳитини яратиш, хусусан, хом ашё ресурсларини импорт қилиш ҳисобига тайёр маҳсулотни ички бозорга ва экспортга йўналтириш имконини беради.
Аҳолининг асосий турдаги озиқ-овқат маҳсулотлари билан таъминланганлик даражаси ҳамда ички бозордаги нарх барқарорлигидан келиб чиқиб Иқтисодиёт ва молия вазирлигининг асослантирилган таклифига кўра, импорт қилинган ўсимлик ёғининг 50 фоизидан ошмаган миқдорини эскпорт қилишга рухсат бериш бекор қилиниши мумкин.
Изоҳ (0)