“Lukoyl” kompaniyasi vitse-prezidenti va aviamodellashtirish bo‘yicha chempion Vitaliy Robertus 54 yoshida vafot etdi. Bu haqda kompaniya matbuot xizmati xabar berdi. Bu oxirgi ikki yil ichida korporatsiyadagi top menejerning to‘rtinchi o‘limidir.
“U bizning xotiramizda iqtidorli rahbar, ko‘p qirrali shaxs bo‘lib qoladi”, — deyiladi “Lukoyl” saytidagi press-relizda.
Kompaniya top-menejerning o‘limi sabablari va sharoitlarini oshkor qilmagan. Robertusning karyerasi faqat “Lukoyl” bilan bog‘liq. U Moskva aviatsiya institutida o‘qigandan so‘ng darhol korporatsiyada faoliyatini boshlagan. Robertus kompaniyada iqtisodchi sifatida ishlagan va 30 yildan ortiq vaqt mobaynida kompaniyaning menejeri va vitse-prezidenti lavozimiga ko‘tarilgan.
Bundan tashqari, u avimodellashtirish sportchisi edi. U bir necha bor aviamodellashtirish bo‘yicha Rossiya va jahon chempioni bo‘lgan. Robertus shuningdek, yuzdan ortiq dronlarni loyihalashtirib, sinovdan o‘tkazgan.
“Lukoyl”ning top-menejerlari o‘limi
Vitaliy Robertus so‘nggi ikki yil ichida vafot etgan “Lukoyl”ning to‘rtinchi top-menejeridir. 2023-yil oktyabr oyi oxirida kompaniya direktorlar kengashi raisi Vladimir Nekrasov vafot etgan, u 66 yoshda edi. Shifokorlar xulosasiga ko‘ra, uning o‘limiga o‘tkir yurak yetishmovchiligi sabab bo‘lgan. Baza Telegram kanali o‘limidan bir necha kun oldin erkak spirtli ichimliklarni iste’mol qila boshlagani haqida xabar bergan.
Vladimir Nekrasov 2022-yilning kuzida “Lukoyl” direktorlar kengashining avvalgi rahbari Ravil Maganov vafotidan keyin direktorlar kengashi rahbari etib saylangan edi. 2022-yil 1-sentyabr kuni 67 yoshli Maganov Moskvadagi Markaziy klinik shifoxonadagi derazadan qulashi natijasida vafot etgan. “Lukoyl” matbuot xizmati o‘limga “og‘ir kasallik” sabab bo‘lganini aytgan.
2022-yil may oyida 44 yoshida “Lukoyl” boshqaruvining sobiq a’zosi Aleksandr Subbotin vafot etdi. U Moskvadagi uyning yerto‘lasida o‘lik holda topilgan. O‘limning rasmiy sababi o‘tkir yurak yetishmovchiligi sifatida ko‘rsatilgan.
Izoh (0)