Yaponiyaning ilk xususiy sun’iy yo‘ldoshli raketasi ishga tushirilgach portlab ketdi

Space One tomonidan amalga oshirilgan Yaponiyaning sun’iy yo‘ldoshli birinchi xususiy raketa parvozi muvaffaqiyatsiz yakunlandi. Raketa uchirilganidan bir necha soniya o‘tib portlagan. Bu haqda ‘‘TASS’’ xabar berdi.

Raketa qoldiqlari parvoz maydoni yaqinidagi tog‘larga qulagan. Muvaffaqiyatsizlik sababi hozircha noma’lum. Raketada Yer yuzasini kuzatish uchun mo‘ljallangan taxminan 100 kg og‘irlikdagi hukumat sun’iy yo‘ldoshi bo‘lgan.

Kairos raketasining uzunligi 18 m, og‘irligi esa taxminan 23 tonnani tashkil etgan. Shtab-kvartirasi Tokioda joylashgan Space One uni 2018-yildan beri ishlab chiqqan edi.

Hukumatda kosmik industriya rivojlanishini nazorat qiluvchi iqtisodiy xavfsizlik vaziri Sanae Takaichi ta’kidlaganidek, Yaponiya 2030-yillarning birinchi yarmi oxirigacha yillik raketalar sonini taxminan 30 taga yetkazmoqchi. 

Yaponiya aerokosmik tadqiqotlar agentligi (JAXA) so‘nggi 10 yil ichida 30 dan ortiq kosmik parvozlarni amalga oshirgan. Bundan tashqari, Mitsubishi Heavy Industries davlat korporatsiyasi muntazam ravishda razvedkachi sun’iy yo‘ldoshlarini uchiradi.