Yevropaning 15 yildan beri ishlamayotgan ERS-2 sun’iy yo‘ldoshi orbitadan chiqib, atmosferaning zich qatlamlarida yonib ketishi kutilmoqda. Uning parchalari Yerga tushishi mumkin. Bu haqda Yevropa kosmik agentligiga tayanib, “Interfaks” xabar berdi.
Og‘irligi 2,3 tonna bo‘lgan sun’iy yo‘ldosh 1995-yil aprel oyida Fransiya Gvianasidagi kosmodromdan Yerning quruq yuzasi, okeanlarni o‘rganish uchun uchirilgan. U 2011-yil sentyabr oyida yonilg‘isi qolmagani sabab o‘z faoliyatini tugatgan.
So‘nggi prognozlarga ko‘ra, ERS-2 sun’iy yo‘ldoshi 80 kilometr balandlikda Yer atmosferasiga kiradi va janubi-sharqiy Afrika uzra parchalana boshlaydi. Qurilmaning yonmagan bo‘laklari Yer yuzasiga yetib borishi mumkin, biroq katta ehtimol bilan Hind okeaniga tushadi.
“Sun’iy yo‘ldosh parchalarining hech biri zaharli yoki radioaktiv moddalarni o‘z ichiga olmaydi”, — deyiladi xabarda.
Izoh (0)