Eron nashrlarida chiqqan xabarlarga ko‘ra, 1350 kilometr uzunlikdagi Chobahor—Saraxs temiryo‘li yaqinda qurib bitkaziladi va ushbu temiryo‘l orqali Markaziy Osiyo davlatlari Hind okeani bilan bog‘lanishi mumkin. Siyosatshunos Farhod Karimov “Daryo”ga ushbu masalada o‘z fikr-mulohazalarini bildirib o‘tdi.
Siyosatshunosning ta’kidlashicha, mustaqillikning ilk yillari O‘zbekiston va Turkmaniston o‘rtasida Eron tomonga temiryo‘l qurilgan. Bugun Eron portlariga chiqish uchun shu yo‘lni qayta tiklash kerak.
“Bu ishni texnik jihatdan amalga oshirish mumkin. Mustaqillikning ilk yillari O‘zbekiston va Turkmaniston o‘rtasida Eron tomonga temiryo‘l qurilgan. Bir vaqtlar Turkmanistonga mintaqadagi asosiy geosiyosiy o‘yinchilar bosim qilib, bu loyihani to‘xtatib qo‘ygan edi. Agar bu yo‘lak ishga tushib, O‘zbekiston okeanga chiqib ketganida, shimoliy koridorning ahamiyati juda tushib ketar edi. Shu sababli bu loyiha to‘xtatib qo‘yilgandi”, — deydi Farhod Karimov.
Mutaxassisning qo‘shimcha qilishicha, O‘zbekiston bu loyihani amalga oshirish uchun ayrim geosiyosiy markazlarni ko‘ndirishi lozim.
“Bugun yo‘l ishga tushib ketishiga hech kim kafolat bermaydi. Chunki yana bosimlar bo‘lishi mumkin. Ammo bir jihatdan yutuqli tomoni, hozirgi geosiyosiy vaziyat 90-yillardagi vaziyatdan mutlaqo farq qiladi. Bundan tashqari, O‘zbekiston Eron va Turkmaniston bilan juda yaxshi munosabatlarni yo‘lga qo‘yib olgan. Bu loyihani amalga oshirish O‘zbekiston uchun suv va havodek zarur. Masalan, bugungi kunda Afg‘oniston bilan ham temiryo‘l masalasida muzokaralar olib bormoqdamiz. Umuman olganda, loyihani amalga oshirish uchun ayrim geosiyosiy markazlarni ko‘ndirishimiz kerak”, — dedi siyosatshunos Farhod Karimov.
Ma’lumot uchun, ushbu temiryo‘l yiliga 8,5 million tonna yuk tashish quvvatiga ega va Markaziy Osiyo davlatlari o‘z mahsulotlarini butun dunyoga eksport qilish uchun Chobahor portidan keng foydalanishi mumkin. Eron hukumati Chobahor portining yuk tashish quvvatini yiliga 33 million tonnagacha oshirishni rejalashtirmoqda.
Izoh (0)