Эрон нашрларида чиққан хабарларга кўра, 1350 километр узунликдаги Чобаҳор—Сарахс темирйўли яқинда қуриб битказилади ва ушбу темирйўл орқали Марказий Осиё давлатлари Ҳинд океани билан боғланиши мумкин. Сиёсатшунос Фарҳод Каримов “Дарё”га ушбу масалада ўз фикр-мулоҳазаларини билдириб ўтди.
Сиёсатшуноснинг таъкидлашича, мустақилликнинг илк йиллари Ўзбекистон ва Туркманистон ўртасида Эрон томонга темирйўл қурилган. Бугун Эрон портларига чиқиш учун шу йўлни қайта тиклаш керак.
“Бу ишни техник жиҳатдан амалга ошириш мумкин. Мустақилликнинг илк йиллари Ўзбекистон ва Туркманистон ўртасида Эрон томонга темирйўл қурилган. Бир вақтлар Туркманистонга минтақадаги асосий геосиёсий ўйинчилар босим қилиб, бу лойиҳани тўхтатиб қўйган эди. Агар бу йўлак ишга тушиб, Ўзбекистон океанга чиқиб кетганида, шимолий коридорнинг аҳамияти жуда тушиб кетар эди. Шу сабабли бу лойиҳа тўхтатиб қўйилганди”, — дейди Фарҳод Каримов.
Мутахассиснинг қўшимча қилишича, Ўзбекистон бу лойиҳани амалга ошириш учун айрим геосиёсий марказларни кўндириши лозим.
“Бугун йўл ишга тушиб кетишига ҳеч ким кафолат бермайди. Чунки яна босимлар бўлиши мумкин. Аммо бир жиҳатдан ютуқли томони, ҳозирги геосиёсий вазият 90 йиллардаги вазиятдан мутлақо фарқ қилади. Бундан ташқари, Ўзбекистон Эрон ва Туркманистон билан жуда яхши муносабатларни йўлга қўйиб олган. Бу лойиҳани амалга ошириш Ўзбекистон учун сув ва ҳаводек зарур. Масалан, бугунги кунда Афғонистон билан ҳам темирйўл масаласида музокаралар олиб бормоқдамиз. Умуман олганда, лойиҳани амалга ошириш учун айрим геосиёсий марказларни кўндиришимиз керак”, — деди сиёсатшунос Фарҳод Каримов.
Маълумот учун, ушбу темирйўл йилига 8,5 миллион тонна юк ташиш қувватига эга ва Марказий Осиё давлатлари ўз маҳсулотларини бутун дунёга экспорт қилиш учун Чобаҳор портидан кенг фойдаланиши мумкин. Эрон ҳукумати Чобаҳор портининг юк ташиш қувватини йилига 33 миллион тоннагача оширишни режалаштирмоқда.
Изоҳ (0)