Rossiya hali ham yadro qurolidan foydalanishi mumkin, u uzoq masofaga uchuvchi yadroviy kallakli raketalar ishlab chiqmoqda. AQSH razvedkasi o‘zining tegishli hisobotini e’lon qildi.
Hisobotda Rossiya o‘zining yadroviy qurol salohiyatini modernizatsiya qilishda davom etishi, eng katta va xilma-xil yadroviy qurol zaxirasini saqlab qolishi ta’kidlandi.
“Moskva o‘zining yadroviy imkoniyatlarini AQSH va NATOga qarshi yuzaga kelishi mumkin bo‘lgan mojaroda o‘z maqsadlariga erishishda zarur deb hisoblaydi va buni Rossiya uchun yakuniy kafolat deb biladi.
Rossiyaning jang maydonida tez va qatʼiy g‘alabaga erisha olmagani, Ukrainaning Rossiya ichidagi zarbalari bilan birga Putin yadro qurolidan foydalanishi mumkinligidan xavotir uyg‘otadi”, — deyiladi razvedka hisobotida.
Shuningdek, razvedka 2023-yilda Putin Minskning uzoq yillik iltimosiga javoban yadro qurolini Belarusga ko‘chirishga tayyorligini ochiq e’lon qilganini esladi.
“Moskva AQSHning raketaga qarshi mudofaa tizimidan o‘tish yoki undan qochish uchun uzoq masofali yadro kallaklariga ega raketalar va suvosti yetkazib berish tizimlarini ishlab chiqishda davom etadi. Rossiya yadroviy yoki oddiy kallaklarni yetkazib berishga qodir bo‘lgan katta va xilma-xil strategik bo‘lmagan tizimlarni kengaytirmoqda hamda modernizatsiya qilmoqda, chunki Moskva nazarida bunday tizimlar dushmanni to‘xtatib turish, potensial harbiy harakatlar kuchayishini nazorat qilish, AQSH va ittifoqchi kuchlarga qarshi turish imkonini beradi”, — deya xulosa qildi amerikalik razvedka zobitlari.
Izoh (0)