“Rossiyadagi jinoiy diktatura rejimini tinch yo‘l bilan ag‘darib bo‘lmaydi”: “Rossiyaga ozodlik” legioni, “Sibir batalyoni” Kursk va Belgorodda operatsiya boshladi (video)

Ukraina tomonida jang qilayotgan “Rossiyaga ozodlik” legioni va “Sibir batalyoni” 12-martga o‘tar kechasi Rossiya chegarasini kesib o‘tib, rus armiyasi bilan to‘qnashganini ma’lum qildi. Bu haqda The Moscow Times xabar berdi.

Rossiya Federatsiyasidagi jinoiy diktatura rejimini tinch yo‘l bilan ag‘darib bo‘lmaydi, deb aytgan edik. Uni faqat qo‘lda qurol bilan tinchitish mumkin. Bu tunda biz va’dani bajarishga kirishdik. Rossiya hududida shiddatli janglar ketmoqda, — deyiladi “Sibir batalyoni” Telegram kanalida.

“Rossiyaga ozodlik” legioni vakillari “rejimdan yerimizni santimetr-santimetrigacha qaytarishni va’da beramiz”, degan.

Diversantlar Belgorod va Kursk viloyatlarida chegarani buzib o‘tishga uringan, — deb tasdiqladi rossiyaparast WarGonzo Telegram kanali huquq-tartibot idoralaridagi manbalarga tayanib.

Uning so‘zlariga ko‘ra, taxminan soat 03:00 larda Xarkov viloyati Odnorobovka qishlog‘idan oldinga siljiyotgan 50 kishilik guruh Belgorod viloyati chegarasiga hujum qilgan.

Ukrainadan kelgan otryadlar yuk mashinalari va zirhli mashinalarda edi, — deydi “Sladkov+” kanali. 

Rossiyaning boshqa Z-kanallariga ko‘ra, diversantlar tanklar va bronetransportyorlarda bo‘lgan. “Sladkov+” otryadlar chegarani buzib o‘ta olmaganini va rus kuchlari bir nechta zirhli texnikani yo‘q qilganini yozmoqda.

Kursk viloyatidagi jang Tetkino qishlog‘i yaqinida ertalab soat 08.00 larda boshlangan. Dushman uch tomondan chegarani buzib o‘tishga uringan. Himoyachilarimiz tomonidan murosasiz otishma bilan kutib olingan. Biroq, alohida otishmalar, o‘t ochish holatlari hozirgacha davom etmoqda, — deb xabar beradi WarGonzo. 

Shuningdek, to‘qnashuvlar chog‘ida ikki kishi jarohatlangani, ulardan biri Tetkino qishlog‘ida yashashi, ikkinchisi haqida hozircha ma’lumot yo‘qligi aytilmoqda.

Davlat dumasining sobiq deputati Ilya Ponomarevning ta’kidlashicha, “Rossiyaga ozodlik” legioni va “Sibir batalyoni” Belgorod va Kursk viloyatlariga kirgan. Xususan, ular Belgorod viloyatidagi Lozovaya Rudka chegarasini nazoratga olgan. Shuningdek, Rossiya ko‘ngillilar korpusi ham Rossiya hududiga kirib kelgani aytilmoqda.

Ukraina razvedkasi vakili Andrey Yusovning aytishicha, sanab o‘tilgan barcha tuzilmalar Rossiya fuqarolaridan iborat bo‘lgani sababli mustaqil bo‘linmalar sifatida ishlaydi. 

Ehtimol, hozir bu bo‘linmalarning qo‘shma operatsiyasi olib borilmoqda, — dedi Yusov. 

Rossiya hukumati Ukraina bilan chegaradagi janglar haqida rasman xabar bermadi.