“Xitoyning birlashishiga to‘sqinlik qilish badali og‘ir bo‘ladi” — Xitoyning Yaponiyadagi rasmiysi

Xitoyning Yaponiyadagi elchixonasi matbuot kotibi Xitoyning ichki ishlariga aralashish va Xitoy birlashuviga to‘sqinlik qilishning badali juda og‘ir bo‘lishini maʼlum qildi. Bu haqda China Daily nashri xabar berdi.

Xabarda aytilishicha, Yaponiya mudofaa kuchlari va AQSH harbiylari o‘zlarining qo‘shma qo‘mondonlik punkti mashg‘ulotlarida birinchi marta Xitoyni “potensial dushman” deb atagan. Tayvanda favqulodda vaziyat yuzaga kelgan taqdirda, qanday harakat olib borish to‘g‘risida mashg‘ulot ssenariylari namoyish etilgan.

Ushbu voqealarga nisbatan Xitoyning Yaponiyadagi elchixonasi matbuot kotibi tezkor munosabat bildirgan. Bunday harakatlar “Yagona Xitoy” tamoyilini va Xitoy va Yaponiya o‘rtasidagi to‘rtta siyosiy hujjat ruhini jiddiy buzishi maʼlum qilingan.

“Men Tayvan Xitoyning bir qismi ekanligini va Tayvan masalasiga hech qanday tashqi aralashuv bo‘lishi mumkin emasligini taʼkidlamoqchiman. Hech kim Xitoy xalqining kuchli qatʼiyat va irodasi, milliy suvereniteti va hududiy yaxlitligini himoya qilishdagi ulkan imkoniyatlarini past baholashi kerak emas”, — degan elchixona rasmiysi.

“Agar kimdir Xitoyning ichki ishlariga aralashishni va Xitoyning birlashishiga to‘sqinlik qilishni istasa, endi Xitoy shunchaki ‘ramziy dushman’ bo‘lmaydi. Xitoyga nisbatan bunday harakatlar badali og‘ir bo‘ladi”, — deb qo‘shimcha qilgan matbuot kotibi.