Хитойнинг Япониядаги элчихонаси матбуот котиби Хитойнинг ички ишларига аралашиш ва Хитой бирлашувига тўсқинлик қилишнинг бадали жуда оғир бўлишини маълум қилди. Бу ҳақда China Daily нашри хабар берди.
Хабарда айтилишича, Япония мудофаа кучлари ва АҚШ ҳарбийлари ўзларининг қўшма қўмондонлик пункти машғулотларида биринчи марта Хитойни “потенциал душман” деб атаган. Тайванда фавқулодда вазият юзага келган тақдирда, қандай ҳаракат олиб бориш тўғрисида машғулот сценарийлари намойиш этилган.
Ушбу воқеаларга нисбатан Хитойнинг Япониядаги элчихонаси матбуот котиби тезкор муносабат билдирган. Бундай ҳаракатлар “Ягона Хитой” тамойилини ва Хитой ва Япония ўртасидаги тўртта сиёсий ҳужжат руҳини жиддий бузиши маълум қилинган.
“Мен Тайван Хитойнинг бир қисми эканлигини ва Тайван масаласига ҳеч қандай ташқи аралашув бўлиши мумкин эмаслигини таъкидламоқчиман. Ҳеч ким Хитой халқининг кучли қатъият ва иродаси, миллий суверенитети ва ҳудудий яхлитлигини ҳимоя қилишдаги улкан имкониятларини паст баҳолаши керак эмас”, — деган элчихона расмийси.
“Агар кимдир Хитойнинг ички ишларига аралашишни ва Хитойнинг бирлашишига тўсқинлик қилишни истаса, энди Хитой шунчаки ‘рамзий душман’ бўлмайди. Хитойга нисбатан бундай ҳаракатлар бадали оғир бўлади”, — деб қўшимча қилган матбуот котиби.
Изоҳ (0)