Shvetsiya parlamentida (Riksdag) Markaziy Osiyo davlatlari bilan hamkorlik bo‘yicha Do‘stlik guruhi tashkil etildi. Bu haqda “Dunyo” axborot agentligi axborot xizmati xabar berdi.
Unga ko‘ra, Markaziy Osiyo davlatlari bilan hamkorlik bo‘yicha Do‘stlik guruhi tashkil etilgani munosabati bilan o‘tkazilgan 5-mart kungi tadbirda guruh rahbari va aʼzolari tanishtirildi hamda istiqboldagi vazifalar xususida fikr almashildi. Do‘stlik guruhi raisi lavozimiga 2010—2014-yillarda shved demokratlari partiyasi yetakchisi (mamlakatdagi ikkinchi yirik partiya), 2014—2018-yillarda Riksdag spikerining birinchi o‘rinbosari hamda hozirgi kunda Yevropada xavfsizlik va hamkorlik tashkilotining Shvetsiya parlamentidagi delegatsiyasi rahbari sifatida faoliyat yuritib kelayotgan Byorn Syoder maʼqullandi.
Uchrashuvda, shuningdek, Markaziy Osiyo va Shvetsiya o‘rtasida siyosiy, savdo-iqtisodiy va madaniy-gumanitar yo‘nalishlarni rivojlantirish, jumladan, ushbu sohalarni yanada faollashtirishga qaratilgan qo‘shma tadbirlarni tashkil etish masalalari xususida fikr almashildi.
Tadbir yakunida Markaziy Osiyo davlatlari parlamentlaridagi Shvetsiya bilan Do‘stlik guruhlari hamda Riksdagdagi Markaziy Osiyo bilan hamkorlik bo‘yicha Do‘stlik guruhi rahbarlari va aʼzolari o‘rtasida aloqalarni yo‘lga qo‘yish, onlayn uchrashuvlar va o‘zaro tashriflarni amalga oshirish to‘g‘risida kelishib olindi.
Izoh (0)