Farg‘ona viloyati Oltiariq tumanida erini jarohatlagan ayolga sud hukmi o‘qildi. Bu haqda “Millar” dasturida xabar berildi.
Holat Farg‘ona viloyati Oltiariq tumani sobiq kollej yotoqxonasiga joylashtirilgan oilada yuz bergan. Maʼlum qilinishicha, 2019-yildan buyon sharʼiy nikoh asosida birga yashab kelayotgan erkak va ayol ro‘zg‘ordagi kamchiliklar va oilaviy mojarolar sababli o‘zaro tortishib qolgan.
Oqibatda erkak mast holatda ayolni turli so‘zlar bilan haqoratlaydi. Janjal davomida ayol oshxonadan o‘tkir tig‘li jismni olib, erining chap ko‘krak qismiga urib, unga og‘ir tan jarohati yetkazgan. Jabrlanuvchi xonadondagi boshqa oila aʼzolari tomonidan zudlik bilan shifoxonaga olib borilib, uning hayoti saqlab qolingan.
Mazkur holat jinoyat ishlari bo‘yicha Oltiariq tuman sudida ko‘rib chiqildi. Sudda jabrlanuvchi ayblanuvchi ayol uning turmush o‘rtog‘i ekani sababli unga nisbatan hech qanday daʼvosi yo‘qligini bildirdi. Sud hukmi bilan ayblanuvchiga oylik ish haqining 20 foizi davlat daromadi hisobiga ushlab qolgan holda 3 yil muddatga axloq tuzatish ishlari jazosi tayinlandi.
Izoh (0)