Покистонда 22 ёшли талаба WhatsApp платформаси орқали куфр келтирганликда айбланиб, ўлимга ҳукм қилинди. Бу ҳақда BBC хабар берди.
Панжоб вилояти суди айбланувчи WhatsApp’да фото ва видеоларни мусулмонларнинг диний туйғуларига путур етказиш мақсадида тарқатганини айтди. Худди шундай айблов билан 17 ёшли бола умрбод қамоқ жазосига ҳукм қилинди. Иккала айбланувчи ҳам қонунбузарликни рад этмоқда.
Покистонда куфр ўлим билан жазоланади. Айрим гумонланувчилар иши судгача етиб бормасдан олдин қатл қилинади. Суд қарорида айтилишича, 22 ёшли йигит Муҳаммад пайғамбар ва унинг рафиқаларини ҳақорат қилувчи фото ва видеоларни ясагани учун ўлим жазосига ҳукм қилинган. Иккинчи айбланувчи эса материаллар тарқатгани учун умрбодга қамалмоқда.
Ўлим жазосига ҳукм қилинган маҳбуснинг отаси Лаҳор Олий судига апелляция шикояти бераётганини айтди.
Покистонда ислом динини ёки Муҳаммад пайғамбарни ҳақорат қилишда айбдор деб топилган ҳар қандай шахс ўлим ёки умрбод қамоқ жазосига ҳукм қилиниши мумкин. Мисол тариқасида, Покистонда эркак WhatsApp’га жойлаштирган контенти сабаб ўлимга ҳукм қилинганди. Покистонда куфр жуда нозик масала бўлиб, ҳатто исботланмаган айбловлар ҳам зўравонликни қўзғатиши мумкин.
Покистон расмийлари ўтган февраль ойида “куфрона” контентни олиб ташлаш талабларини бажармагани учун Wikipedia веб-энциклопедиясини блоклаганди. Wikipedia компаниясига ушбу маълумотларни ўчириш учун 48 соат вақт берилганди. На нашр, на Покистон расмийлари қайси “куфрона” контентни назарда тутгани ҳақида маълумот берилган.
Изоҳ (0)