Gaiti poytaxti Port-o-Prensda mahalliy qurolli guruhlar prezident saroyiga hujum uyushtirdi. Bu haqda ABC News xabar berdi.
Ma’lum qilinishicha, Ichki ishlar vazirligi binosi va politsiya bo‘limi ham hujumga uchragan. Shahar otishmalar qurshovida qolgan, portlash ovozlari ham eshitilgan. Port-o-Prensdagi prezident saroyi 2021-yil iyul oyida prezident Jovenel Mois otib o‘ldirilganidan beri bo‘sh.
2010-yilda ro‘y bergan kuchli zilzila majmuaning katta qismini vayron qilib, ko‘p qismini yaroqsiz holga keltirgan. Biroq u Gaiti federal ma’muriyatining ramzi bo‘lib qolmoqda va kuniga 24 soat qo‘riqlanadi.
AQSH Davlat departamenti Gaitida jinoiy guruh zo‘ravonliklari davom etayotgani sababli Amerika fuqarolaridan u yerni tark etishni so‘ramoqda.
2-mart kuni qurolli shaxslar milliy qamoqxonaga hujum qilib, u yerdan 4 ming mahbusni chiqarib yuborgandi. Bu Gaiti bosh vaziri banditizmga qarshi kurashish uchun xalqaro kontingentni joylashtirish bo‘yicha muzokaralar olib borish maqsadida Keniyaga borganidan ikki kun o‘tgach sodir bo‘ldi.
“Barbekyu” laqabli qurolli guruh yetakchisi Jimmi Sherizye bosh vazir Ariye Anriga qarshi urush e’lon qilgan. U hujumlardan maqsad Gaiti politsiyasi boshlig‘i, hukumat vazirlarini qo‘lga olish va Anrini hokimiyatdan ag‘darish ekanini aytgan.
Izoh (0)