Toshkent shahar hokimligi yerusti metro tarmog‘i ostidagi biznes binolari qurilishi yakunlanganini ma’lum qildi.
“Yashnobod tumanidagi yerusti metro tarmog‘i ostida barpo etilgan chakana savdo va maishiy xizmat ko‘rsatish birinchi bosqich obyektlarini qurish ishlari o‘z yakuniga yetdi”, — deyiladi xabarda.
Xaridorlarga Ohangaron shossesi va Toshkent halqa yo‘li bo‘ylab 60 ga yaqin obyekt taklif etilmoqda. Binolardan savdo yoki maishiy xizmat ko‘rsatish uchun foydalanish mumkin.
Bunda ijara shartnomalari besh yil muddatga tuziladi. Binolar ro‘yxati va ular haqidagi ma’lumotlarni batafsil quyidagi havola orqali olish mumkin. Boshlang‘ich narxlar mulkning joylashgan o‘rniga qarab 190 million so‘mdan 220 million so‘mgacha.
- Eslatib o‘tamiz, 2021-yilning oktyabrida qabul qilingan prezident qarori bilan yer osti va yerusti metro bekatlarida savdo va xizmat ko‘rsatish maydonchalarini tashkil etib, tadbirkorlarga auksion asosida ijaraga berish belgilangandi.
- 2023-yilning fevral oyida yerusti metro yo‘nalishi estakadasi ostidagi hududlarda jami 2700 o‘rinli avtoturargohlar tashkil etilishi haqida ma’lum qilindi.
- Noyabrga kelib, poytaxt hokimligi metroning yerusti liniyalari ostidagi binolarni ijaraga berilishini ma’lum qildi.
- Yer usti metro liniyalari ostidagi foydalanilmayotgan yerlarning umumiy maydoni 100 ming kvadrat metrni tashkil etadi.
Izoh (0)