Go‘zal sochlarning tabiiy siri: xinaning siz bilmagan xususiyatlari

Insonlar xinadan tabiiy bo‘yoq sifatida ko‘p asrlardan beri foydalanib kelishadi, uni yorqin rangi va sochlarni mustahkamlash xususiyati uchun ham boshqa vositalardan afzal ko‘rishadi.

Xina Afrika, O‘rta Sharq mintaqasining issiq iqlimga ega mamlakatlarida o‘suvchi lavsoniya o‘simligidan olingan kukun bo‘lib, tarkibida tabiiy bo‘yoq – tanin saqlanadi. Xinaning foydali xususiyatlari ham talaygina – u teri kasalliklari, yaralar, kuyish jarohatlarini davolashga yordam beradi, ortiqcha terlashdan xalos etadi. Sochlar masalasiga kelsak, xina ularga o‘ziga xos rang berish bilan birga qazg‘oqlarni yo‘q qilish, tolalar tuzilishini mustahkamlashga ko‘maklashadi, sochlar ildizini oziqlantiradi, o‘sishini tezlashtiradi va ularga hajm beradi.

Xinadan tabiiy bo‘yoq sifatida foydalanuvchi tajribali mutaxassislar yakuniy rang har bir odamda turlicha bo‘lishini taʼkidlaydilar. Sochlarni xina bilan bo‘yaganda tolalar har doim qizg‘ish rangga kirishi – yanglish fikr.

Xina kukuni o‘simlik moyi va meva kislotalaridan tayyorlanadigan maxsus bo‘yoqlar ichiga ham qo‘shiladi. Bunday bo‘yoqlar odatda bosh terisini tinchlantiruvchi o‘simliklar, Ye vitamini hamda proteinga boy bo‘ladi. Mutaxassislar shunday tarkibga ega bo‘yoqlar yordamida sochlarni 30 dan ortiq ranglarga bo‘yash usullarini o‘ylab topishgan. Ularning aytishlaricha, har bir aralashma soch tuzilishi, rangi va avval foydalanilgan bo‘yoqlardan kelib chiqqan holda individual tarzda tayyorlanadi.

Sochlaringiz o‘zingiz istamagan yorqinlikdagi qizg‘ish rangga (baʼzan yakuniy rang yashil bo‘lishi mumkin) bo‘yalishini xohlamasangiz, xinadan uy sharoitida foydalanishni tavsiya qilmaymiz. Sochlarni xina bilan bo‘yashda aralashma tarkibini to‘g‘ri tanlash, bo‘yoqni sochlarda qoldirish vaqtini aniq belgilash, uning qoldiqlarini yuvib tashlash, xinaning o‘tkir hididan xalos bo‘lish va rang uzoqroq saqlanib turishi uchun kerakli vositalardan foydalanish muhim ahamiyat kasb etadi.

Sochlarni xina bilan bo‘yashdan avval uning rangini boshqa turdagi bo‘yoqlar bilan “berkitib” bo‘lmasligini yodga oling. Aynan shuning uchun ham natija siz istagandek bo‘lishiga harakat qiling.

Bugungi kunda malla rang sochlar urfga qaytmoqda, yevropalik xonimlar esa sochlarini bir xil rangga bo‘yab, tolalarning ayrimlariga biroz o‘zgacha tus berishmoqda. Xina bu borada sizga ham qo‘l keladi: uning yordamida bir vaqtning o‘zida ham tabiiy, ham o‘ziga xos rang hosil qilsa bo‘ladi.