Pokistonda29-fevraldan beri davom etayotgan kuchli yomg‘irlar oqibatida bir qancha uylar qulab tushdi va ko‘chkilar kuzatildi. Natijada 35 kishi halok bo‘ldi va 50 kishi jarohat oldi. Bu haqda hukumat rasmiylariga tayanib, Al Jazeera xabar berdi.
Xabarga ko‘ra, Afg‘oniston bilan chegaradosh Xaybar-Paxtunxva viloyatining turli hududlarida yomg‘ir tufayli kamida 30 kishi halok bo‘lgan. Ularning ko‘pchiligi ayollar va bolalar.
Hukumat 10 mingga yaqin odamni evakuatsiya qilish uchun qayiqlardan foydalanishga majbur bo‘lgan. Balujiston bosh vaziri Sarfraz Bugti yakshanba kuni 700 ta uyga zarar yetganini ma’lum qilgan. Kashmirda ham qurbonlar va katta vayronagarchiliklar qayd etilgan.
Pokistonning Samaa telekanaliga ko‘ra, mamlakat armiyasi 1300 dan ortiq xonadonga 28 tonna oziq-ovqat tarqatgan va yaradorlar uchun tibbiy lagerlar tashkil etgan. Birlashgan Millatlar Tashkiloti ma’lumotlariga ko‘ra, Pokiston iqlim o‘zgarishiga eng zaif 10 ta davlat qatoriga kiradi.
Bu yil Pokiston fevral oyida boshlangan qishki yomg‘irning noodatiy kechikishiga guvoh bo‘lgan. Musson va qishki yomg‘irlar har yili Pokistonga zarar yetkazadi.
2022-yilda Pokistonda iqlim sabab bo‘lgan g‘ayrioddiy musson yomg‘irlari va suv toshqini 1800 ga yaqin odamning hayotiga zomin bo‘lgan, 33 millionga yaqin odam zarar ko‘rgan.
Izoh (0)