Покистонда29 февралдан бери давом этаётган кучли ёмғирлар оқибатида бир қанча уйлар қулаб тушди ва кўчкилар кузатилди. Натижада 35 киши ҳалок бўлди ва 50 киши жароҳат олди. Бу ҳақда ҳукумат расмийларига таяниб, Al Jazeera хабар берди.
Хабарга кўра, Афғонистон билан чегарадош Хайбар-Пахтунхва вилоятининг турли ҳудудларида ёмғир туфайли камида 30 киши ҳалок бўлган. Уларнинг кўпчилиги аёллар ва болалар.
Ҳукумат 10 мингга яқин одамни эвакуация қилиш учун қайиқлардан фойдаланишга мажбур бўлган. Балужистон бош вазири Сарфраз Бугти якшанба куни 700 та уйга зарар етганини маълум қилган. Кашмирда ҳам қурбонлар ва катта вайронагарчиликлар қайд этилган.
Покистоннинг Sамаа телеканалига кўра, мамлакат армияси 1300 дан ортиқ хонадонга 28 тонна озиқ-овқат тарқатган ва ярадорлар учун тиббий лагерлар ташкил этган. Бирлашган Миллатлар Ташкилоти маълумотларига кўра, Покистон иқлим ўзгаришига энг заиф 10 та давлат қаторига киради.
Бу йил Покистон февраль ойида бошланган қишки ёмғирнинг ноодатий кечикишига гувоҳ бўлган. Муссон ва қишки ёмғирлар ҳар йили Покистонга зарар етказади.
2022 йилда Покистонда иқлим сабаб бўлган ғайриоддий муссон ёмғирлари ва сув тошқини 1800 га яқин одамнинг ҳаётига зомин бўлган, 33 миллионга яқин одам зарар кўрган.
Изоҳ (0)