Prezident Shavkat Mirziyoyev 2024-yilning 16-fevral kuni Andijon viloyatiga tashrifi chog‘ida Xonobod shahrining “Yangi hayot” mahallasida ham bo‘ldi. Davlat rahbari mahalladagi xonadonlarda bo‘lib, aholining yashash sharoitini o‘rgangandi. Salohiddin Usmonov xonadonida mehmon bo‘lgan prezident uning 8 sotixli tomorqasidan unumli foydalanib, qo‘ziqorin yetishtirishini olqishladi. Hududlarda tajribani ommalashtirish kerakligini ta’kidladi. “Daryo” muxbiri prezidentni mehmon bo‘lgan qilgan xonadon vakillari bilan suhbatlashdi.
Prezidentimizning xonadonimizga tashrifi biz uchun juda ham omadli bo‘ldi. Oilamizga baxt cheki tushdi deb g‘oyatda xursandmiz. U kishining xonadonimizga kirib, kunlik qilayotgan mehnatimizni e’tirof etgani, issiqxonagacha kirib hamsuhbat bo‘lganidan boshimiz osmonga yetdi. Hali ham hayajondamiz. Uchrashuvdan so‘ng yurtboshimiz turmush o‘rtog‘imga “Uka, shunchalik harakat qilibsizlar, nechta xonadonga nafingiz tegyapti ekan. Buning uchun kelinga ham, sizga ham rahmat”, degach, to‘g‘risi, ko‘zimga yosh keldi. Anjancha aytganda maza qildim, — deydi prezident mehmon bo‘lgan xonadon bekasi Ziyoda Usmonova.
Ziyoda opa taassurotlari bilan o‘rtoqlashar ekan, qanday qilib qo‘ziqorin biznesiga aralashib qolgani haqida gapirib berdi.
Uzoq yillar Xonobod shahridagi tibbiyot birlashmasida hamshira bo‘lib ishlaganman. Biroq 2010-yildan keyin salomatligim to‘g‘ri kelmagach, ishlamay qo‘ydim. Shundan buyon uy bekasiman. Turmush o‘rtog‘im veterinar bo‘lgani uchun keng dalada chorvachilik bilan shug‘ullanganmiz. Keyinchalik shu mahallaga ko‘chib o‘tgach, hayvonlarni sotib, shularning evaziga ikki qavatli uy qurdik. Farzandlarni o‘qitdik. Doim ish bilan band bo‘lgan odam uyda bekor o‘tirolmas ekan. Hovlida turli gul ko‘chatlari, sabzavotlar yetishtiramiz, parrandalar boqamiz. Umuman olganda yerning har bir qarichidan unumli foydalanishga harakat qilamiz.
Katta farzandimni Xitoyda o‘qitganmiz. Shu o‘g‘lim pandemiyada uyga qaytib keldi. O‘zingizga ma’lum o‘shanda hamma uyda o‘tirib qoldi. Shunda o‘g‘lim qo‘ziqorin foydali narsa ekanligini, shuni yetishtirib ko‘rishni tavsiya qildi. Dadasiga aytganimizda dastlab unamasdan “Yig‘ishtir ishingni, undan ko‘ra molni, qo‘yni boq. Shundan foyda”, dedi. Shunaqa bo‘lsa-da, qiziqishimiz kuchlilik qilib bir harakat qilib ko‘raylik, deb ona-bola yashirincha ishni boshlab yuborgandik, — deydi suhbatdosh.
Xonadon bekasining ta’kidlashicha, dastlab qo‘ziqorin urug‘lari oilaviy iste’mol uchun yetishtirishga mo‘ljallangan. Biroq qo‘ni-qo‘shnilarning xaridor bo‘lgani ularni yanada ko‘proq hosil yetishtirishga undagan.
Dastlab Toshkentdan 10 kilo urug‘ keltirib, kichkinagina xonada yetishtirishni boshladik. Birinchi ko‘chatlarimiz shunaqa chiroyli ochilib, chiroyli hosil berdi ko‘zimizni quvontirdi. Qo‘ni-qo‘shni va qarindosh-urug‘lar ko‘rib, qiziqib nima bu deb ham so‘rashdi. Qo‘ziqorinligini aytib, foydali jihatlarini, organizmda xolesterin moddasi to‘planishining oldini olishini tushuntirgandik qiziqishdi. O‘zimiz ham, bizdan olib ketganlar ham qo‘ziqorindan salat, somsa va boshqa ovqatlarni qilib yedik. Hammaga yoqdi. Xaridorlar chiqa boshladi. Buni ko‘rib, sotsa bo‘lar ekan, yaxshigina biznes deb keyin yana yigirma kilogramm olib keldik. O‘zimizning iste’molimiz uchun yetishtirgan hosilimizdan kutilmagandek pul kela boshladi. Buni ko‘rib turmush o‘rtog‘imning o‘zi ham qiziqib qoldi. Yetishtirishda o‘zi ham qatnashadigan, suvi va xona haroratiga qaraydigan bo‘ldi.
Hozir u kishi asosan ishda bo‘lgani uchun dam olish kunlari yoki bekor bo‘lib qolganida o‘zi sheluxalarni olib kelib, urug‘larini ekib, qarashib turadi. Qiziqish bilan boshlangan ishga Alloh baraka berib, qo‘ziqorin yetishtirishga o‘tib ketdik.
Qo‘ziqorinlarni dastlab xonalarda yetishtirgan bo‘lsak, hozir asosan ushbu issiqxonada parvarishlanadi. Ayni paytda bu yerda uch yuzta qopimiz bor. Bulardan har uch kunda yigirma kilogacha hosil uzib yetishtiramiz. Ularni shahardagi va viloyatdagi kafe, restoran va do‘konlarga beramiz. Bundan bir oyda o‘rtacha 10 milliongacha daromad olyapmiz desam mubolag‘a bo‘lmaydi. Misol uchun, bitta qopimiz barcha xarajati bilan 25 ming so‘mga tayyor bo‘ladi. Me’yorda yetishtirilsa, bitta qopdagi urug‘ uch oy davomida minimum 5 kilogacha hosil berishi mumkin. Ya’ni 25 ming so‘m sarflab, eng kami 125 ming foyda olish mumkin, — deydi xonadon bekasi.
Xonadon egalarining aytishicha, hozirda qo‘ziqorin yetishtirish bilan mahallada yigirmaga yaqin, atrofdagi tumanlarda esa ellikka yaqin oila shug‘ullanadi. Ular shu biznesga bosh qo‘shganlarga maslahatlar berib keladi.
Bekorchilikni xush ko‘rmayman. Shu sababli qo‘shni ayollar ko‘chada bekor qolganini ko‘rsam, ularni nimadir qilishga chaqiraman. Besh-olti oy avval mahalladagi ishsiz, bekor o‘tirgan ayollarga shu ish bilan shug‘ullanishni taklif qildim. O‘ylanishdi. Shunda “Kelinglar bir qilib ko‘ringlar, ishi, mehnati og‘ir emas, yaxshi e’tibor berib, suv sepib tursangiz bo‘ldi”, dedim. Dastlab ikkita qo‘shnim boshladi. Hozir ularning qo‘ziqorinlari hosil berishni boshlagan. Keyinchalik yana o‘n ikkita xonadon xayrixohlik bildirgan.
Bundan tashqari, atrofdagi boshqa Andijon, Paxtaobod, Ulug‘nor va Qo‘rg‘ontepa tumanlarida yashovchi yana 70 ta xonadonga ham urug‘ tarqatganmiz. Ular bilan doim aloqadamiz, tushunmaganlarini o‘rgatib, maslahat berib turibmiz. Kerak bo‘lsa hosilini bizga bersa, o‘zimiz xaridorlarga yetkazib beryapmiz. Kelgusida issiqxonani yanada kattalashtirib, ishchi yollab ishlatish rejamizda bor. Maqsadimiz — nafaqat viloyatimiz, balki qo‘shni davlatlarga ham eksport qilish. Chunki, Qirg‘iziston va Tojikistondan talablar tusha boshlagan. Ish ko‘lamini kengaytirgach, urug‘ga bo‘lgan talab ham ortadi. Shu sababli xo‘jaynim o‘zi qanday qilib qo‘ziqorin urug‘ini olish, tayyorlash bo‘yicha o‘rganishlar olib boryapti. Bundan tashqari iste’mol talabi yuqori bo‘lgan boshqa yangi navlarni ham yetishtirishni yo‘lga qo‘yish istagimiz bor, — deydi suhbatdosh.
Oila boshlig‘i Salohiddin Usmonovning aytishicha, davlat rahbarining xonadoniga tashrifi va bergan maslahatlari sabab barcha oila-a’zolarini haligacha hayajon tark etmagan.
To‘g‘risini aytish kerak, tashrifdan beri meni hayajon tark etgani yo‘q. Xursandchiligim cheksiz. Yurtboshimizning eng chekka hududda yashovchi biz kabi fuqarolar xonadoniga tashrif buyurganidan nafaqat men, balki butun oilamiz juda xursand. Bizga katta umid, ertangi kunga ishonch berildi. U kishidan o‘zimga kuch oldim.
Prezidentimiz xonadonimizga tashrif buyurish chog‘ida uyimizga nur kirib kelgandek bo‘ldi. Suhbat davomida faoliyatimizni yanada rivojlantirish, kerak bo‘lsa buni klaster darajasiga olib chiqish bo‘yicha topshiriq berildi. Shundan kelib chiqib, yaqin orada Xitoyga borib kelib, yana yetti-sakkizta yangi navni yetishtirishni yo‘lga qo‘yishni rejalashtirmoqdamiz. Bundan tashqari, uyda turib ko‘proq daromad olish bo‘yicha yangi g‘oyalar ustida ishlamoqchimiz. Davlatimiz rahbari bizga shunday bir shijoat berdiki, endi to‘xtab qolmasdan faqat oldinga intilamiz, — deydi Salohiddin aka.
Izoh (0)