“Andijon” klubi 5 milliard so‘m turadigan futbolchini sotib oldi

Qishki transfer ishlarida anchagina faol “Andijon” futbol klubi hujum chizig‘ini kuchaytirishga alohida e’tibor qaratmoqda. Bunga qadar oldingi chiziq vakillari sifatida Rustam Turdimurodov hamda rossiyalik Luka Zgurskiyning transferlari e'lon qilindi.

Hujumchilar safiga Tojikiston milliy terma jamoasi a’zosi Shaxram Samiyev kelib qo‘shildi. Klub futbolchi bilan uch yilga shartnoma imzolagan. 

Ma’lumot uchun, Samiyev 2001-yilning 8-fevral kuni tavallud topgan. Uning oxirgi klubi Moldovaning “Milsami” jamoasi hisoblanadi.

Shaxram Tojikistonning turli yoshdagi termalarida ham o‘ynagan va hozirda u milliy terma jamoaning muhim futbolchilaridan biri hisoblanadi. Samiyev Tojikiston termasida hozirga qadar 27 ta uchrashuvda ishtirok etib 7 ta gol urdi.

Yaqinda Qatarda bo‘lib o‘tgan Osiyo Kubogida Samiyev Tojikiston terma jamoasi sharafini himoya qildi.

23 yoshli futbolchining narxi Transfermarkt ma’lumotiga qaraganda 400 ming dollarni tashkil etadi. “Andijon” klubi transfer summasini e‘lon qilmagan.