Yevropa Ittifoqi davlatlari Ukrainaga o‘q-dorilar sotib olish uchun 1,5 milliard dollar izlamoqda, deb yozadi Financial Times (FT) gazetasi manbalarga tayanib.
“Chexiya Ukraina uchun o‘q-dorilar topdi, lekin uning pulini to‘lashga chexlarda mablag‘ yo‘q”, deb yozadi gazeta manbalaridan biri. Chexiya tashabbusiga Yevropa Ittifoqining bir qancha davlatlari qo‘shildi, biroq Praga ularning aniq sonini oshkor etmayapti. Shuningdek, Chexiya hukumati qurol sotmoqchi bo‘layotgan davlatning nomini ham oshkor qilmayapti.
Manbalarga ko‘ra, Fransiya va Gretsiya Ukrainaga yordam berish uchun snaryadlarni faqat Yevropa Ittifoqi mamlakatlari va Norvegiyada sotib olish mumkin, deb hisoblab, bunday tashabbusga qarshi. Gretsiya, shuningdek, Chexiya Turkiyaning mudofaa shirkatlaridan snaryadlar sotib olish niyatida ekanidan xavotirda.
17-fevral kuni Chexiya prezidenti Petr Pavel Myunxen xavfsizlik konferensiyasidagi chiqishi chog‘ida Praga Yevropa Ittifoqidan tashqarida Ukraina uchun yarim million dona 155 mm snaryad va 300 ming dona 122 mm snaryad topganini aytgandi.
1-fevral kuni Yevrokomissiya rahbari Ursula fon der Lyayen YI martgacha va’da qilingan 1 million o‘rniga bor-yo‘g‘i 500 ming snaryad yetkazib berishini ma’lum qildi. Uning so‘zlariga ko‘ra, YI harbiy ishlab chiqarishni 40 foizga oshirgan.
Izoh (0)