Jo Bayden AQSHning Rossiyaga qarshi e’lon qilgan sanksiyalari mamlakat mudofaa-sanoat kompleksiga aloqador 100 ga yaqin kompaniyaga ta’sir qilishini aytdi.
Oq uy veb-saytida e’lon qilingan bayonotda u AQSHning yangi sanksiyalar paketi 500 dan ortiq obyektga qaratilgani haqidagi ma’lumotni ham tasdiqladi.
Jo Baydenning taʼkidlashicha, sanksiyalar “Rossiya urush mashinasini parda ortidan qo‘llab-quvvatlovchi” yuzlab korxonalarga tegishli. Ular energetika sohasiga ham ta’sir qiladi, dedi u.
Jo Baydenning so‘zlariga ko‘ra, gap rossiyalik muxolifatchi Aleksey Navalniyning o‘limi bilan bog‘liq sanksiyalar haqida bormoqda.
“Ushbu sanksiyalar Navalniyning qamoqqa olinishiga aloqador shaxslar, shuningdek, Rossiya moliya sektori, mudofaa sanoat bazasi, xarid qilish tarmoqlari va ko‘plab qitʼalardagi sanksiyalardan bo‘yin tovlagan shaxslarga qaratilgan”, — dedi Amerika prezidenti.
Avvalroq AQSH moliya vaziri o‘rinbosari Uolli Adeyemo cheklovlar “500 dan ortiq obyektga” ta’sir qilishini aytgandi.
Yevropa Ittifoqi va AQSH 24-fevralda, Ukrainada harbiy harakatlar boshlanganining ikki yilligi munosabati bilan yangi cheklovlar joriy etishi taxmin qilingan edi. Bugun, 23-fevral kuni YI Rossiyaga qarshi 13-sanksiya paketini e’lon qildi. Uning tarkibiga 106 nafar jismoniy va 88 ta yuridik shaxs, shuningdek, Rossiya harbiy-sanoat kompleksini qo‘llab-quvvatlovchi 27 ta tashkilot kirgan.
Izoh (0)