Европа Иттифоқи давлатлари Украинага ўқ-дорилар сотиб олиш учун 1,5 миллиард доллар изламоқда, деб ёзади Financial Times (FT) газетаси манбаларга таяниб.
“Чехия Украина учун ўқ-дорилар топди, лекин унинг пулини тўлашга чехларда маблағ йўқ”, деб ёзади газета манбаларидан бири. Чехия ташаббусига Европа Иттифоқининг бир қанча давлатлари қўшилди, бироқ Прага уларнинг аниқ сонини ошкор этмаяпти. Шунингдек, Чехия ҳукумати қурол сотмоқчи бўлаётган давлатнинг номини ҳам ошкор қилмаяпти.
Манбаларга кўра, Франция ва Греция Украинага ёрдам бериш учун снарядларни фақат Европа Иттифоқи мамлакатлари ва Норвегияда сотиб олиш мумкин, деб ҳисоблаб, бундай ташаббусга қарши. Греция, шунингдек, Чехия Туркиянинг мудофаа ширкатларидан снарядлар сотиб олиш ниятида эканидан хавотирда.
17 февраль куни Чехия президенти Петр Павел Мюнхен хавфсизлик конференциясидаги чиқиши чоғида Прага Европа Иттифоқидан ташқарида Украина учун ярим миллион дона 155 мм снаряд ва 300 минг дона 122 мм снаряд топганини айтганди.
1 февраль куни Еврокомиссия раҳбари Урсула фон дер Ляен ЕИ мартгача ваъда қилинган 1 миллион ўрнига бор-йўғи 500 минг снаряд етказиб беришини маълум қилди. Унинг сўзларига кўра, ЕИ ҳарбий ишлаб чиқаришни 40 фоизга оширган.
Изоҳ (0)