Suriyadagi terrorchilar safida jang qilib, jiddiy jarohat olgan jizzaxlik yigit qo‘lga olinib, O‘zbekistonga olib kelindi.
Ma’lum qilinishicha, 2000-yilda Jizzax viloyatida tug‘ilgan shaxs internet orqali Suriyadagi “Tavhid va jihod katibasi” terroristik tashkiloti aʼzosi bilan tanishib, ularning safiga borib qo‘shilishni maqsad qilgan.
So‘ngra virtual tanishining huquqni muhofaza qiluvchi organ xodimlarining eʼtiboriga tushmaslik bo‘yicha bergan ko‘rsatmalari asosida, 2023-yilning iyun oyida aviachiptani aynan uchib ketish kuni qimmat narxda bo‘lishiga qaramay sotib olib, Istanbulga jo‘nab ketgan.
Turkiya orqali Suriyaga o‘tgan jizzaxlik yigit “Tavhid va jihod katibasi” terroristik tashkiloti aʼzolari safida g‘oyaviy hamda harbiy tayyorgarlikdan o‘tgan. DXX tomonidan e’lon qilingan xabarda ta’kidlanishicha, jangarilar safida bo‘lgan paytida ham ruhiy, ham jismoniy zarbalarga uchragan yigit taskilot a’zolarining og‘iz ko‘pirtirib birodarchilik degan gaplari aslida quruq safsata ekani, mazlumlarni himoya qilish haqidagi gaplari ularning qabih niyatlarini yashirish uchun niqob ekanini tushunib yetadi.
“Men Suriyada hayot yaxshi, islomiy hayot, islomga amal qiladigan davlat qurilyapti, deb o‘ylaganman. U yerga yetib borganimdan keyin yon-atrofimda bombalar portlaganini, haqiqiy ahvolni ko‘rganimdan keyin fikrim o‘zgardi”, — deydi yigit.
U Suriya hukumati kuchlari tomonidan amalga oshirilgan harbiy amaliyotlar natijasida jiddiy jarohat olgan. Sog‘lig‘i tiklanganidan keyin, u terroristik tashkilotning xo‘jalik ishlariga jalb etilgan.
U 2023-yilning dekabr oyida davolanish uchun yashirin yo‘llar bilan Suriyadan qo‘shni davlatga o‘tgan vaqtida qo‘lga olingach, O‘zbekistonga olib kelingan.
“Jihod qilaman deb borgan joyimda unday narsa yo‘qligini anglab yetdim. Umrim bekor o‘tib ketdi. Insonlar bunday tinch joyda yashayotgani, ota-onasining oldida sog‘-salomat bo‘lib turganini his qilib, anglab, shukur qilib yashashi kerak.
Birodarchilik deydi, lekin birodarchilik alomatlarining birortasini ham ko‘rmadim. O‘lgani o‘lib ketadi, qolgani Turkiyada jon saqlash uchun qochib chiqadi, juda ko‘pini ko‘rdim. Arablar ichida yotgan bo‘lsam, arablar ham aytyapti, senga nima bor bu yerda, hech qanday jihod yo‘q, islomiy davlat ham yo‘q, faqat zulm qiladi birorta yaxshilik qilmaydi bular, deb. Tinchlik yo‘q, pul uchun hammasi. Holat judayam og‘ir”, — deydi yigit o‘z iqrorida.
Hozirda unga nisbatan DXX tomonidan Jinoyat kodeksining 155-2 (terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish) va 244-2 (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) moddalari bilan jinoyat ishi qo‘zg‘atilib, qamoq ehtiyot chorasi qo‘llanilgan.
Izoh (0)