Суриядаги террорчилар сафида жанг қилиб, жиддий жароҳат олган жиззахлик йигит қўлга олиниб, Ўзбекистонга олиб келинди.
Маълум қилинишича, 2000 йилда Жиззах вилоятида туғилган шахс интернет орқали Суриядаги “Тавҳид ва жиҳод катибаси” террористик ташкилоти аъзоси билан танишиб, уларнинг сафига бориб қўшилишни мақсад қилган.
Сўнгра виртуал танишининг ҳуқуқни муҳофаза қилувчи орган ходимларининг эътиборига тушмаслик бўйича берган кўрсатмалари асосида, 2023 йилнинг июнь ойида авиачиптани айнан учиб кетиш куни қиммат нархда бўлишига қарамай сотиб олиб, Истанбулга жўнаб кетган.
Туркия орқали Сурияга ўтган жиззахлик йигит “Тавҳид ва жиҳод катибаси” террористик ташкилоти аъзолари сафида ғоявий ҳамда ҳарбий тайёргарликдан ўтган. ДХХ томонидан эълон қилинган хабарда таъкидланишича, жангарилар сафида бўлган пайтида ҳам руҳий, ҳам жисмоний зарбаларга учраган йигит таскилот аъзоларининг оғиз кўпиртириб биродарчилик деган гаплари аслида қуруқ сафсата экани, мазлумларни ҳимоя қилиш ҳақидаги гаплари уларнинг қабиҳ ниятларини яшириш учун ниқоб эканини тушуниб етади.
“Мен Сурияда ҳаёт яхши, исломий ҳаёт, исломга амал қиладиган давлат қуриляпти, деб ўйлаганман. У ерга етиб борганимдан кейин ён-атрофимда бомбалар портлаганини, ҳақиқий аҳволни кўрганимдан кейин фикрим ўзгарди”, — дейди йигит.
У Сурия ҳукумати кучлари томонидан амалга оширилган ҳарбий амалиётлар натижасида жиддий жароҳат олган. Соғлиғи тикланганидан кейин, у террористик ташкилотнинг хўжалик ишларига жалб этилган.
У 2023 йилнинг декабрь ойида даволаниш учун яширин йўллар билан Суриядан қўшни давлатга ўтган вақтида қўлга олингач, Ўзбекистонга олиб келинган.
“Жиҳод қиламан деб борган жойимда ундай нарса йўқлигини англаб етдим. Умрим бекор ўтиб кетди. Инсонлар бундай тинч жойда яшаётгани, ота-онасининг олдида соғ-саломат бўлиб турганини ҳис қилиб, англаб, шукур қилиб яшаши керак.
Биродарчилик дейди, лекин биродарчилик аломатларининг бирортасини ҳам кўрмадим. Ўлгани ўлиб кетади, қолгани Туркияда жон сақлаш учун қочиб чиқади, жуда кўпини кўрдим. Араблар ичида ётган бўлсам, араблар ҳам айтяпти, сенга нима бор бу ерда, ҳеч қандай жиҳод йўқ, исломий давлат ҳам йўқ, фақат зулм қилади бирорта яхшилик қилмайди булар, деб. Тинчлик йўқ, пул учун ҳаммаси. Ҳолат жудаям оғир”, — дейди йигит ўз иқрорида.
Ҳозирда унга нисбатан ДХХ томонидан Жиноят кодексининг 155-2 (террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш) ва 244-2 (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) моддалари билан жиноят иши қўзғатилиб, қамоқ эҳтиёт чораси қўлланилган.
Изоҳ (0)