O‘zbekistonda gaz bosimining odatdagidan ko‘ra past ekaniga qaramay, 22-fevral kuni ham uning isteʼmoli yuqoriligicha qoldi. Kecha mazkur miqdor 154,6 million kubometrni tashkil qildi, deb xabar beradi Energetika vazirligi matbuot xizmati.
“Tabiiy gaz hajmi meʼyoriy sxemaga yaqinlashyapti. Biroq gaz bosimining pastligi meʼyoriy sxemaning to‘liq tiklanishini kechiktiryapti”, — deyiladi xabarda.
Qayd etilishicha, magistral gaz quvurlarida gaz bosimining keskin tushib ketishi oqibatlarini bartaraf etish, respublika isteʼmolchilari hamda issiqlik elektr stansiyalarini tabiiy gaz bilan bir maromda taʼminlashda yuzaga kelishi mumkin bo‘lgan salbiy holatlarning oldini olish maqsadida bir qator zarur choralar ko‘rilmoqda.
Xususan, aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida barcha hududlardagi avtomobillarga gaz to‘ldirish kompressor shoxobchalarning ish faoliyati mahalliy hokimliklar tomonidan tasdiqlangan reja-grafik asosida tizimli ravishda yo‘lga qo‘yilmoqda.
22-fevral kuni mamlakatdagi 481 ta ana shunday shoxobcha orqali aholiga va ijtimoiy sohalar obyektlariga tegishli avtomobillar, shuningdek, jamoat transportlarining barcha turlariga 3 million 239 ming kubometr tabiiy gaz yetkazib berilgan.
O‘zbekistonga kelib chiqishi arktik bo‘lgan sovuq va nam havo massalari kirib kelishi 16-fevraldan boshlangandi. Respublikada havo sovishi ortidan metan zapravkalar ish jadvaliga o‘zgartirishlar kiritilishi mumkinligi haqida “Hududgaztaʼminot” matbuot xizmati avvalroq ma’lum qilgandi.
Izoh (0)