Samarqand, Qashqadaryo va Jizzax viloyatlarida noqonuniy ravishda yer maydonlarini sotmoqchi bo‘lgan shaxslar ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Ishtixon tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda O.D. ismli shaxs fuqaro O.A.ga “E.A.” fermer xo‘jaligining 1 gektar yer maydonini firibgarlik yo‘li bilan 13 ming dollarga sotgan vaqtida ashyoviy dalillar bilan ushlangan.
Shu kabi, departamentning Bulung‘ur tuman bo‘limi tomonidan o‘tkazilgan tezkor tadbirda M.A. ismli shaxs fuqaro N.Q.ga 35 sotix zaxiradagi yer maydonini 24 ming dollarga kadastr hujjatlarini uning nomiga rasmiylashtirib olib berishini aytib, oldindan 11 ming dollar olgan vaqtda ashyoviy dalillar bilan ushlangan.
Departamentning Qarshi shahar bo‘limi tomonidan IIB xodimlari bilan hamkorlikda o‘tkazilgan tezkor tadbirda esa A.S. va S.A. ismli shaxslar “Parg‘uza” MFY hududidagi 12 sotix zaxiradagi yer maydonini fuqaro N.T.ga go‘yoki kadastr idoralarida ishlovchi tanishlari yordamida rasmiylashtirib olib berishi evaziga 10 ming dollar olgan vaqtida ashyoviy dalillar bilan qo‘lga olingan.
Departamentning Jizzax viloyat boshqarmasi tomonidan DXX xodimlari bilan hamkorlikda o‘tkazilgan tezkor tadbirda M.X. ismli shaxs fuqaro S.S.ning ishonchiga kirib, unga Mirzacho‘l tuman “Mirzadala” SHFYda joylashgan 6 sotix zaxiradagi yer maydonini qalbaki hujjatlar orqali o‘ziniki ekanligini aytib, ushbu yer maydonini 6,4 ming dollarga sotayotgan vaqtida ashyoviy dalillar orqali ushlangan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
- Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.
Izoh (0)