Farg‘onada mobil dasturlar yaratib, ular orqali o‘zgalarning plastik kartalaridagi mablag‘larni o‘g‘irlagan kiberfiribgarlarga sud hukmi o‘qildi, deb xabar beradi O‘zA.
Qayd etilishicha, Toshkent shahrida yashovchi, tadbirkor Sh.Sh. hamda Turin politexnika universiteti talabasi A.Y. axborot tizimi orqali odamlarni chuv tushirish rejasini tuzgan. Ular “Agrobank mobile” zararli ilovasini yaratgan va bu orqali fuqarolarning plastik kartasidan erkin foydalanish imkoniyatiga ega bo‘lgan.
Ushbu shaxslar dastur yordamida fuqaro A.N.ning plastik kartasidagi 47 million 235 ming so‘m miqdoridagi pul mablag‘ini birjada kriptovalyutaga almashtirgan holda mazkur mablag‘larni yashirin ravishda talon-toroj qilgan. Bundan tashqari, fuqaro O.J.ning kartasidagi 45 million 225 ming so‘m miqdoridagi pul mablag‘larini ham kriptovalyutaga almashtirgan holda o‘zlashtirib olgan.
Farg‘ona viloyat IIB kiberxavfsizlik bo‘limi xodimlari tomonidan mazkur holatlar bo‘yicha tezkor texnik tadbirlar o‘tkazilib, ikkala shaxs ham ushlangan. Sudlanuvchilarga sud hukmi bilan 5 yil muddatga ozodlikdan mahrum etish jazosi tayinlangan.
Avvalroq Namanganda maktab o‘quvchisi ustozining plastik kartasidan 2 million so‘m yechib olgani to‘g‘risida xabar berilgandi. 2022-yil iyulda esa Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlangan edi. Iyul boshida bo‘lsa, Buxoro viloyati G‘ijduvon tumanidagi bank filiali kassiri mijozlarning 41 ta bank kartalaridagi mablag‘larni o‘g‘irlagani ma’lum bo‘ldi.
Izoh (0)