Toshkent shahrining Bunyodkor shohko‘chasida stretch plyonkalarga o‘ralgan holda piyodalar o‘tish joyidan dumalab o‘tishga uringan yigitlarga chora ko‘rildi. Bu haqda “Milliy” telekanalining “Millar” dasturida maʼlum qilindi.
Qayd etilishicha, 20 yoshli uch nafar yigit odamlar gavjum joydan tanasini butunlay plyonkaga o‘ragan holda dumalab o‘tishga kelishgan. Ular holatni tasvirga olib, internetga joylash orqali tanilishni maqsad qilgan.
“Men shu shartni menga bergin, deb iltimos qilganman. Bilardim, maqsad tanilish, shu orqali internetga chiqib ketish edi. Svetoforning yashil chirog‘ida tez o‘tib olaman degandim”, — deydi yigitlardan biri.
Yana bir yigit esa sherigining dumalab o‘tishini videoga olib turgan. Shu payt voqea joyiga YPX xodimi yetib kelib, fuqarolarni to‘xtatib qolgan.
Holat yuzasidan Chilonzor tumani IIB tomonidan Maʼmuriy javobgarlik to‘g‘risidagi kodeksning 183- (mayda bezorilik) va 194-modda (ichki ishlar organlari xodimining qonuniy talablarini bajarmaslik)lari bilan bayonnoma rasmiylashtirilgan va tuman sudiga yuborilgan.
Sud qaroriga ko‘ra, yigitlar bilan aybli deb topilgan va ularning har biriga 10 sutkadan qamoq jazosi tayinlangan.
Eslatib o‘tamiz, 2023-yil avgust oyida “Chechenka” taxallusi bilan tanilgan instabloger Gulzoda Abdullayeva turmush o‘rtog‘iga ikkinchi xotin sovg‘a qilgani aks etgan video ko‘plab muhokamalarga sabab bo‘lgandi. O‘shanda u Ma’muriy javobgarlik to‘g‘risidagi kodeksning 21-moddasiga asosan javobgarlikdan ozod etilgan va ogohlantirish bilan kifoyalangan edi.
Izoh (0)