Тошкент шаҳрининг Бунёдкор шоҳкўчасида стретч плёнкаларга ўралган ҳолда пиёдалар ўтиш жойидан думалаб ўтишга уринган йигитларга чора кўрилди. Бу ҳақда “Миллий” телеканалининг “Миллар” дастурида маълум қилинди.
Қайд этилишича, 20 ёшли уч нафар йигит одамлар гавжум жойдан танасини бутунлай плёнкага ўраган ҳолда думалаб ўтишга келишган. Улар ҳолатни тасвирга олиб, интернетга жойлаш орқали танилишни мақсад қилган.
“Мен шу шартни менга бергин, деб илтимос қилганман. Билардим, мақсад танилиш, шу орқали интернетга чиқиб кетиш эди. Светофорнинг яшил чироғида тез ўтиб оламан дегандим”, — дейди йигитлардан бири.
Яна бир йигит эса шеригининг думалаб ўтишини видеога олиб турган. Шу пайт воқеа жойига ЙПХ ходими етиб келиб, фуқароларни тўхтатиб қолган.
Ҳолат юзасидан Чилонзор тумани ИИБ томонидан Маъмурий жавобгарлик тўғрисидаги кодекснинг 183- (майда безорилик) ва 194-модда (ички ишлар органлари ходимининг қонуний талабларини бажармаслик)лари билан баённома расмийлаштирилган ва туман судига юборилган.
Суд қарорига кўра, йигитлар билан айбли деб топилган ва уларнинг ҳар бирига 10 суткадан қамоқ жазоси тайинланган.
Эслатиб ўтамиз, 2023 йил август ойида “Чеченка” тахаллуси билан танилган инстаблогер Гулзода Абдуллаева турмуш ўртоғига иккинчи хотин совға қилгани акс этган видео кўплаб муҳокамаларга сабаб бўлганди. Ўшанда у Маъмурий жавобгарлик тўғрисидаги кодекснинг 21-моддасига асосан жавобгарликдан озод этилган ва огоҳлантириш билан кифояланган эди.
Изоҳ (0)