Polsha fermerlari qishloq xo‘jaligi vaziri Cheslav Sekerski bilan uchrashuvda Ukraina bilan chegarani vaqtincha yopishni talab qildi. Bunga sabab sifatida ular Ukrainadan qishloq xo‘jaligi mahsulotlari nazoratsiz ravishda mamlakatga kirib kelayotganini ko‘rsatishgan.
“Mening chaqirig‘im shu: keling, chegarani ikki-uch oyga yopaylik, Yevropaga Ukrainadan import qilishni to‘xtataylik, aks holda butun Yevropada ortiqcha don mahsulotlari ko‘payib ketishi mumkin”, — dedi fermerlardan biri Stanislav Barna.
Sekerski Ukraina qishloq xo‘jaligi mahsulotlarining kirib kelishi bilan bog‘liq muammoga boshqa yechimlarni topishni taklif qildi va “chegaralari butunlay yopiq bo‘lgan mamlakatlar yo‘qligini” ta’kidladi. Siyosatchi, shuningdek, fermerlarning Ukrainadagi mahsulot eksportidan tushadigan daromadning ko‘p qismi “mafiya tuzilmalari” qo‘liga o‘tishi haqidagi fikrlariga ham qo‘shildi.
9-fevral kuni polshalik fermerlar keng ko‘lamli norozilik namoyishlari tashkil qilib, Ukraina bilan chegaradagi o‘tish joylarini blokirovka qilishni boshladilar.
Fermerlar Ukrainadan arzon qishloq xo‘jaligi mahsulotlari importini cheklashni yoki butunlay taqiqlashni, milliy chorvachilikni qo‘llab-quvvatlashni kuchaytirishni, shuningdek, Yevropa Ittifoqining 2050-yilgacha uglerod chiqindilarini nolga tenglashtirishni ko‘zda tutuvchi “Yashil kelishuv” strategiyasiga qo‘shilmaslikni talab qilmoqda.
20-fevral kuni namoyishchilar Ukraina bilan chegaradagi barcha o‘tish joylarini to‘sib qo‘ymoqchi.
Izoh (0)