Latviya Konstitutsiyaviy sudi latish tilidan o‘z vaqtida imtihondan o‘tmagan Rossiya fuqarolari — respublikada doimiy yashash joyiga ega bo‘lganlarni deportatsiya qilish to‘g‘risidagi qarorni qonuniy deb tan oldi. Bu haqda Delfi portali xabar berdi.
Uning so‘zlariga ko‘ra, sud hokimiyat talablarini bajarish uchun ajratilgan ikki yillik muddatni yetarli deb hisoblagan. Shu bilan birga, deportatsiya “Latviyada o‘z huquqiy maqomini saqlab qolish uchun hech qanday harakat qilmagan” va respublika bilan aloqalarni mustahkamlashga “hech qanday qiziqish ko‘rsatmagan” ruslarga nisbatan adekvat chora deb ataldi.
Sud deportatsiya to‘g‘risidagi qaror jamoaviy emas, balki alohida shaxslarga nisbatan qo‘llanishini taʼkidladi. Portalning qayd etishicha, bunday choralar “davlat xavfsizligini taʼminlash” uchun zarur.
2022-yil sentyabr oyida Latviya Seymi (bir palatali parlament) migratsiya qonunchiligiga o‘zgartirishlar kiritib, Boltiqbo‘yi respublikasida doimiy yashash joyiga ega bo‘lgan Rossiya fuqarolari 2023-yil 1-sentyabrgacha A2 darajasida latish tilini bilish sertifikatini olishlari shartligini belgilab qo‘ygandi. Aks holda, ularning hujjatlari bekor qilinishi haqida ogohlantirilgan.
14-sentyabr kuni Latviya parlamenti immigratsiya qonunchiligiga respublikada doimiy yashash huquqini olish uchun davlat tili imtihonidan o‘tish muddatini ikki yilga uzaytiruvchi tuzatishlarni yakuniy o‘qishda ma’qulladi. Endi Latviyada yashovchi Rossiya fuqarolari ikki yil muddatga vaqtinchalik yashash uchun ruxsatnoma olishlari mumkin bo‘ladi, bu vaqt ichida ular davlat tilidan imtihon topshirishlari kerak.
Yashash uchun ruxsatnoma olishga ariza 2023-yil 31-dekabrgacha topshirilishi kerak edi. Kechiktirish faqat 2023-yil sentyabr oyining boshigacha imtihon topshirish uchun ro‘yxatdan o‘tganlarga taʼsir qiladi, testdan o‘ta olmaganlarga esa uni qayta topshirish imkoniyati beriladi. Imtihon topshirishdan faqat 75 yoshdan oshgan shaxslar ozod qilinadi.
Izoh (0)