Samarqanddagi “Ipak yo‘li“ xalqaro turizm va madaniy meros universiteti qoshidagi Art-rezidensiyada “Ko‘chib yuruvchi noyob hayvonot olami” nomli rasmlar ko‘rgazmasi ochildi. Bu haqda Ekovazirlik matbuot xizmati xabar berdi.
Maʼlum qilinishicha, ko‘rgazma Yovvoyi hayvonlarning ko‘chib yuruvchi turlarini saqlash bo‘yicha Konvensiya ishtirokchilari konferensiyasining 14-yig‘ilishiga (CMS COP14) bag‘ishlangan. Ekologiya, atrof-muhitni mohofaza qilish va iqlim o‘zgarishi vaziri Aziz Abduhakimovning aytishicha, yosh va iqtidorli rassomlar bir oy davomida turli hayvonlar, qushlarni mahorat bilan aks ettirgan.
“Suratdagi har bir jonzot atrof-muhitni asrashda, bioxilma-xillikni saqlab qolishda muhim ahamiyatga ega. Maqsadimiz kelajak avlodda tabiatga, hayvonlarga mehr-muhabbat hissini uyg‘otish, ularda tabiatga daxldorlik hissini shakllantirishdir”, — degan vazir.
Ko‘rgazmada 2024-yil yanvar oyida Ekologiya vazirligi, Badiiy akademiya va O‘zbekiston Davlat sanʼat muzeyi hamkorligida tashkil etilgan plener davomida chizilgan 40 nafar yosh rassomning 100 ga yaqin rasmlari namoyish qilindi.
Ijodiy plenerdan ko‘zlangan asosiy maqsad — O‘zbekiston Qizil kitobiga kiritilgan noyob ko‘chmanchi jonivorlarga mehr-muhabbat tuyg‘usini kuchaytirish, mamlakatning noyob tabiiy merosini namoyish etish, yosh avlodning ekologik madaniyati va ongini yuksaltirish.
Ko‘rgazma 29-fevralgacha mahalliy aholi va mehmonlar uchun ochiq bo‘ladi.
Izoh (0)