Самарқанддаги “Ипак йўли“ халқаро туризм ва маданий мерос университети қошидаги Арт-резиденсияда “Кўчиб юрувчи ноёб ҳайвонот олами” номли расмлар кўргазмаси очилди. Бу ҳақда Эковазирлик матбуот хизмати хабар берди.
Маълум қилинишича, кўргазма Ёввойи ҳайвонларнинг кўчиб юрувчи турларини сақлаш бўйича Конвенция иштирокчилари конференциясининг 14-йиғилишига (CMS COP14) бағишланган. Экология, атроф-муҳитни моҳофаза қилиш ва иқлим ўзгариши вазири Азиз Абдуҳакимовнинг айтишича, ёш ва иқтидорли рассомлар бир ой давомида турли ҳайвонлар, қушларни маҳорат билан акс эттирган.
“Суратдаги ҳар бир жонзот атроф-муҳитни асрашда, биохилма-хилликни сақлаб қолишда муҳим аҳамиятга эга. Мақсадимиз келажак авлодда табиатга, ҳайвонларга меҳр-муҳаббат ҳиссини уйғотиш, уларда табиатга дахлдорлик ҳиссини шакллантиришдир”, — деган вазир.
Кўргазмада 2024 йил январь ойида Экология вазирлиги, Бадиий академия ва Ўзбекистон Давлат санъат музейи ҳамкорлигида ташкил этилган пленер давомида чизилган 40 нафар ёш рассомнинг 100 га яқин расмлари намойиш қилинди.
Ижодий пленердан кўзланган асосий мақсад — Ўзбекистон Қизил китобига киритилган ноёб кўчманчи жониворларга меҳр-муҳаббат туйғусини кучайтириш, мамлакатнинг ноёб табиий меросини намойиш этиш, ёш авлоднинг экологик маданияти ва онгини юксалтириш.
Кўргазма 29 февралгача маҳаллий аҳоли ва меҳмонлар учун очиқ бўлади.
Изоҳ (0)