Sirdaryo viloyatida 3 nafar iste’molchi 632 million so‘mdan ziyod tabiiy gazdan noqonuniy foydalangani aniqlandi. Bu haqda Energetika vazirligi axborot xizmati xabar berdi.
Unga ko‘ra, Energetika vazirligi huzuridagi “O‘zenergoinspeksiya” tomonidan Bosh prokuratura, IIV hamda gaz ta’minoti korxonalari mutaxassislari bilan hamkorlikda Sirdaryo viloyatida o‘tkazilgan nazorat tadbirlarida tabiiy gazdan noqonuniy foydalanish holatlari aniqlandi.
Xususan, Guliston tumanida istiqomat qiluvchi fuqaro Y.P. xonadonida yashirin tarzda bodroq sexi tashkil qilib, tabiiy gazdan noqonuniy foydalanishi natijasida davlat manfaatlariga 339 million 143 ming so‘mlik zarar yetkazilgani ma’lum bo‘ldi.
Yangiyer shahrida esa “K.A.T.” MCHJga qarashli oshxona (231 million 140 ming so‘m) hamda “N.S.Z.S.” yakka tartibdagi tadbirkorlik subyektiga qarashli novvoyxona (61 million 860 ming) gaz quvuriga texnik ish rejimini buzishga olib keladigan qurilmalar (ya’ni so‘ruvchi nasos) o‘rnatib, gaz tarmog‘iga ulangani natijasida davlat manfaatlariga jami 293 million so‘mlik zarar yetkazilgani aniqlandi.
Qoidabuzar iste’molchilarga nisbatan belgilangan tartibda choralar ko‘rish uchun tegishli hujjatlar rasmiylashtirilib, huquqni muhofaza etuvchi organlarga taqdim qilindi.
Izoh (0)