AQSHning Kenay yarim orolida yangi Alyaska chechagi virusi (Alaskapox virus, AKPV) ga chalingan dunyodagi ilk odam vafot etdi. Bu haqda Alaska Public Media xabar berdi.
Marhum saraton kasalligiga qarshi davolangani sababli immun tizimi zaif bo‘lgan. U o‘rmonli hududda yolg‘iz yashagan va uysiz mushuk bilan aloqada bo‘lgan. Erkakning so‘zlariga ko‘ra, mushuk uni muntazam ravishda tirnagan va mayda sutemizuvchilarni ovlagan. Hayvonda AKPV uchun salbiy test natijasi chiqqan.
Virus birinchi marta 2015-yilda topilgan
Alaska chechagi virusi shtatda 2015-yilda aniqlangan va uning belgilari chechakka o‘xshaydi. Alyaskadagi chechak infeksiyalari faqat olti kishida tasdiqlangan, ularning barchasi Ferbenks hududida qayd etilgan. Barcha infeksiya holatlari hayvonlar bilan aloqa qilish natijasida yuzaga kelgan.
Epidemiolog doktor Juli Rojersning so‘zlariga ko‘ra, virus bilan dastlab hayvon kasallangan. AKPV infeksiyasi kam uchraydi va immuniteti zaif odamlar orasida o‘lim ehtimoli kam. Mutaxassisning fikricha, virus katta ehtimol bilan kasal hayvon bilan bevosita aloqa qilish orqali yuqadi. Shu bilan birga, Rojers virusning odamdan odamga yuqishi haqida hech qanday dalil yo‘qligini ta’kidladi.
Virus aynan qanday yuqishi noma’lum
Mahalliy hokimiyat organlari kichik sutemizuvchilarni AKPV ehtimoliga tekshirgan, virus asosan qizil sichqonlar va olmaxonlarda aniqlangan. Infeksion holatlar juda kam bo‘lgani sababli epidemiologlar odamlar qanday qilib Alyaska chechagi bilan kasallanishi mumkinligini aniq bilmaydi.
Biroq, Kenay yarim orolida bir odamda topilgan AKPV shtammi Alyaskaning ichki qismidagi odamlar va hayvonlarda topilgan shtammdan farq qiladi. Sog‘liqni saqlash departamenti rasmiylari bu virus Alyaskada ilgari o‘ylanganidan ko‘ra kengroq tarqalganini ko‘rsatishi mumkin, deb hisoblaydi.
Yuqumli kasalliklar bo‘yicha mutaxassis doktor Ben Uestli Alyaska chechagi belgilari qatoriga toshma va shishgan limfa tugunlarini kiritdi.
Dunyoda yangi “X” kasalligi boshlanishi mumkin
Yanvar oyida Jahon sog‘liqni saqlash tashkiloti (JSST) rahbari Tedros Adanom Gebreyesus “X” kasalligiga tayyorlanishga chaqirdi. Shu bilan birga, u bu atamaning asl ma’nosiga oydinlik kiritib, gap hech qanday o‘ziga xos kasallik haqida ketmayotganini aytdi:
“X kasalligi – har qanday noma’lum kasallikni bildiradi. Biz 2018-yildan beri bu atamadan foydalanamiz”, — degan edi u.
Izoh (0)