Дунёда илк бор Аляска чечагидан одам вафот этди

АҚШнинг Кенай ярим оролида янги Аляска чечаги вируси (Alaskapox virus, AKPV) га чалинган дунёдаги илк одам вафот этди. Бу ҳақда Alaska Public Media  хабар берди.

Марҳум саратон касаллигига қарши даволангани сабабли иммун тизими заиф бўлган. У ўрмонли ҳудудда ёлғиз яшаган ва уйсиз мушук билан алоқада бўлган. Эркакнинг сўзларига кўра, мушук уни мунтазам равишда тирнаган ва майда сутемизувчиларни овлаган. Ҳайвонда AKPV учун салбий тест натижаси чиққан.

Вирус биринчи марта 2015 йилда топилган

Аляска чечаги вируси штатда 2015 йилда аниқланган ва унинг белгилари чечакка ўхшайди. Аляскадаги чечак инфекциялари фақат олти кишида тасдиқланган, уларнинг барчаси Фербенкс ҳудудида қайд этилган. Барча инфекция ҳолатлари ҳайвонлар билан алоқа қилиш натижасида юзага келган.

Эпидемиолог доктор Жули Рожерснинг сўзларига кўра, вирус билан дастлаб ҳайвон касалланган. АКПВ инфекцияси кам учрайди ва иммунитети заиф одамлар орасида ўлим эҳтимоли кам. Мутахассиснинг фикрича, вирус катта эҳтимол билан касал ҳайвон билан бевосита алоқа қилиш орқали юқади. Шу билан бирга, Рожерс вируснинг одамдан одамга юқиши ҳақида ҳеч қандай далил йўқлигини таъкидлади.

Вирус айнан қандай юқиши номаълум

Маҳаллий ҳокимият органлари кичик сутемизувчиларни AKPV эҳтимолига текширган, вирус асосан қизил сичқонлар ва олмахонларда аниқланган. Инфекцион ҳолатлар жуда кам бўлгани сабабли эпидемиологлар одамлар қандай қилиб Аляска чечаги билан касалланиши мумкинлигини аниқ билмайди.

Бироқ, Кенай ярим оролида бир одамда топилган AKPV штамми Алясканинг ички қисмидаги одамлар ва ҳайвонларда топилган штаммдан фарқ қилади. Соғлиқни сақлаш департаменти расмийлари бу вирус Аляскада илгари ўйланганидан кўра кенгроқ тарқалганини кўрсатиши мумкин, деб ҳисоблайди. 

Юқумли касалликлар бўйича мутахассис доктор Бэн Уэстли Аляска чечаги белгилари қаторига тошма ва шишган лимфа тугунларини киритди.

Дунёда янги “Х” касаллиги бошланиши мумкин

Январь ойида Жаҳон соғлиқни сақлаш ташкилоти (ЖССТ) раҳбари Тедрос Аданом Гебрейесус “Х” касаллигига тайёрланишга чақирди. Шу билан бирга, у бу атаманинг асл маъносига ойдинлик киритиб, гап ҳеч қандай ўзига хос касаллик ҳақида кетмаётганини айтди: 

“Х касаллиги – ҳар қандай номаълум касалликни билдиради. Биз 2018 йилдан бери бу атамадан фойдаланамиз”, — деган эди у.