“Maʼnaviy jinoyat ekanligiga shubha yo‘q”. Alisher Qodirov Navoiy haykali poyida o‘tkazilgan diskotekani tanqid qildi

Oliy Majlis Qonunchilik palatasi spikeri o‘rinbosari Alisher Qodirov universitet hududida talabalar uchun tashkil etilgan diskotekani tanqid qildi.

Ijtimoiy tarmoqlarda Alisher Navoiy nomidagi Toshkent davlat o‘zbek tili va adabiyoti universiteti talabalarining diskoteka uyushtirilgani tasvirlangan videolar tarqaldi.

“Diskoteka o‘tkaziladigan joy bor! Bu joy qancha umidlar bilan o‘zbek tili va adabiyoti himoyachilarini tayyorlashni maqsad qilgan universitet emas! Bunday to‘da bazmning Navoiy haykali poyida o‘tkazilishi — maʼnaviy jinoyat ekanligiga shubha yo‘q, amaldagi qonunchilikka ko‘ra maʼmuriy huquqbuzarlikdir”, — deb yozadi deputat.

Shuningdek, Alisher Qodirov bu ish Ma’muriy javobgarlik to‘g‘risidagi kodeksning 64-moddasiga (Moddiy madaniy meros obyektlarini muhofaza qilish va ulardan foydalanish qoidalarini buzish) 1-qo‘shimcha bilan jarimaga tortilishi, jarimaning arzimas ekanligi o‘z yo‘liga, jamoatchilikning munosabati hal qiluvchi masala ekanini ta’kidlagan.

“Biz Navoiyni tushunmayapmiz, deb qayg‘urayotgan bir vaqtda, aslida, biz Navoiyni mazax qilish darajasida manqurtlashib ketibmizmi?” — deydi deputat.

Eslatib o‘tamiz, 2023-yilning noyabrida Oliy Majlis Qonunchilik palatasining “2024-yil uchun O‘zbekiston Respublikasining Davlat budjeti to‘g‘risida”gi qonun loyihasining muhokamasiga bag‘ishlangan majlisida “Milliy tiklanish” demokratik partiyasi fraksiyasi rahbari Alisher Qodirov o‘qituvchilarga ajratilayotgan budjet mablag‘larining samaradorligi past bo‘layotganini aytib o‘tgandi.