Qonunchilik palatasida Oliy Majlisning Inson huquqlari bo‘yicha vakili (ombudsman)ning 2023-yildagi faoliyati bo‘yicha hisoboti eshitildi. Bu haqda Ombudsman matbuot xizmati xabar berdi.
Qayd etilishicha, 2023-yilda ombudsmanga O‘zbekiston fuqarolari, xorijiy davlatlar fuqarolari va ombudsmanlari, fuqaroligi bo‘lmagan shaxslar, jamoat tashkilotlari va boshqa yuridik shaxslardan kelib tushgan murojaatlar 2023-yilda 18 622 tani tashkil etdi. Bu ko‘rsatkich 2022-yilda 17 761 tani tashkil etgan.
Murojaatlar hududlar kesimida tahlil qilinganda ularning eng ko‘pi Qashqadaryo, Surxondaryo viloyatlariga hamda Toshkent shahriga, eng kam murojaatlar esa Qoraqalpog‘iston Respublikasi va Sirdaryo viloyatiga to‘g‘ri keladi.
Tadbirda deputatlar ombudsman tomonidan davlat organlari va tashkilotlari hamda sudlarga fuqarolarning buzilgan huquqlarini tiklash yuzasidan 170 ta taʼsir choralari kiritilgani, xususan, sudlarga fuqarolar manfaatida berilgan 100 ga yaqin ariza va daʼvo arizalarining 98 foizi qanoatlantirilgani, takroriy murojaatlar soni 2022-yilga nisbatan 21,0 foizga kamayganini ijobiy tajriba sifatida taʼkidladi.
Ombudsman 2023-yilda fuqarolarning ekologik huquq va erkinliklarini taʼminlash yo‘nalishidagi murojaatlar 2022-yilga nisbatan 2,5 barobarga oshib, 316 tani tashkil etganiga alohida eʼtibor qaratdi. Uning so‘zlariga ko‘ra, murojaatlarda shaharsozlik norma va qoidalarining buzilishi natijasida ekologik zararning kelib chiqishi, sanitariya-epidemiologiya qoidalariga rioya etmaslik, toza atrof-muhitga bo‘lgan huquq, ekologik huquqlarni sud orqali himoya qilish bilan bog‘liq masalalari ko‘tarilgan.
Ombudsmanning fuqarolarning ariza va shikoyatlarini ko‘rib chiqishi natijasida 9 ta jinoyat ishi qo‘zg‘atilgan, 1 ta holatda jinoyat ishi qayta malakalangan, 16 ta holatda jinoyat ishi qo‘zg‘atishni rad etish haqida qarorlar tegishli prokurorlar tomonidan bekor qilingan. 5 nafar shaxs maʼmuriy qamoqqa olingan, 4 nafar masʼul egallab turgan lavozimidan ozod etilgan, 18 nafar xodim intizomiy jazoga va 12 nafar masʼul maʼmuriy javobgarlikka tortilgan.
Yig‘ilish yakunida komissiya aʼzolari tomonidan Oliy Majlisning Inson huquqlari bo‘yicha vakili (ombudsman) faoliyatini yanada takomillashtirishga oid taklif va tavsiyalar bildirildi hamda ko‘rib chiqilgan mazkur masala yuzasidan Parlament komissiyasining tegishli qarorlari qabul qilindi.
Izoh (0)