Namanganda O‘zbekistondagi eng baland tomosha charxpalagi o‘rnatildi (video)

Namanganda O‘zbekistondagi eng baland tomosha charxpalagi qad rostlamoqda. Bu haqda “Daryo” muxbiri Azizbek Abduvaliyev xabar bermoqda.

Charxpalak Namangan shahridagi “Afsonalar vodiysi” bog‘ida o‘rnatildi.

“Bog‘imizga kelayotgan mehmonlar, sayyohlarning talab-istaklaridan kelib chiqib attraksionlarimizni yangilayapmiz, o‘zgartiryapmiz. Aslida 2016-yili, bog‘imiz qurilishi payti ham charxpalak o‘rnatish rejada bo‘lgan, faqat joylashuv manzili boshqa yerda edi. Turkiya, Dubaydagi shu kabi mahobatli inshootlarni ko‘rib, o‘rganib, tajriba orttirdik. 2023-yil uchinchi choragida Xitoydan olib keldik va o‘rnatishga kirishdik. O‘zbekistonda shu paytgacha eng baland tomosha charxpalagi balandligi 72 metr bo‘lgan, bizniki 20 metr yuqori. Aslida bundan ham balandroq bo‘lishi mumkin edi, lekin mahalliy landshaft xususiyatlaridan kelib chiqdik”, — deydi “Namangan istiqlol bog‘i” MChJ direktori o‘rinbosari Ibrohim Mamatqulov.

Charxpalakning balandligi 92 metr, jami 54 ta kabinaga ega. Bir paytning o‘zida 216 kishiga xizmat ko‘rsatishi mumkin. Aylanish davri esa 20 daqiqadan ko‘proq.

Aytishlaricha, charxpalakning eng yuqori nuqtasidan hatto qo‘shni Andijon tomonlarni ham ko‘rish mumkin bo‘ladi.

“Hozirda qurilish-montaj ishlari yakunlangan, obodonlashtirish, chiroqlarni o‘rnatish qoldi. Ikki haftalardan so‘ng bular ham tugab, mutaxassislar tomonidan sinovlar boshlanadi. Navro‘z bayrami arafasida barchaga ajoyib sovg‘a bo‘ladi degan umiddamiz. Keyin nasib Hayit ayyomi, xalqaro Gullar festivaliga ulanib ketadi. Charxpalak ishga tushganidan so‘ng kuniga o‘rtacha 10 ming mehmon kelishini kutyapmiz”, — deydi mutasaddi.

Ibrohim Mamatqulovning bildirishicha, charxpalakni olib kelib, o‘rnatish xarajatlari o‘rtacha 1 million dollarni tashkil etgan.

“Shu paytgacha 100 million dollardan ortiq mablag‘ sarflangan bog‘da bunday muhtasham charxpalakning bo‘lishi tabiiy edi. Unga arzigulik nom berish uchun ichki tanlov ham eʼlon qildik. O‘ylaymanki, charxpalak Namangan shahrining o‘ziga xos tashrif qog‘oziga aylanib qoladi”, — deydi u.