Toshkent shahri hokimi vazifasini bajaruvchi Shavkat Umurzoqov AQSHning O‘zbekistondagi favqulodda va muxtor elchisi Jonatan Xenik bilan uchrashdi. Bu haqda poytaxt hokimligi matbuot xizmati xabar berdi.
Shavkat Umurzoqov Toshkentda davlat rahbari tashabbusi bilan ham mahalliy, ham xorijiy kompaniyalar uchun qulay ishbilarmonlik muhiti yaratilganini aytgan. U mazkur uchrashuv ikki taraflama munosabatlar rivoji uchun katta turtki bo‘lishiga ishonch bildirgan.
Jonatan Xenik Toshkentning vaqtincha rezidenti sifatida shahar qiyofasidagi ijobiy o‘zgarishlarni ko‘rib turganidan xursand ekanligini taʼkidlagan. U AQSH ishbilarmon doiralarining Toshkent shahrida yo‘l-transport infratuzilmasini yaxshilash, zargarlik buyumlarini ishlab chiqarish va eksport qilish, texnologik yechimlarni ishlab chiqish va shaharsozlikda qo‘llash sohalarida amalga oshirilayotgan istiqbolli investitsion loyihalarda ishtirok etishdan manfaatdorligi haqida so‘zladi.
Bundan tashqari, grant dasturlari borasidagi hamkorlik doirasida ijtimoiy ahamiyatga ega qo‘shma loyihalarni amalga oshirish imkoniyatlari haqida maʼlumot berdi.
Hokim mehmonning tashabbuslarini qo‘llab-quvvatlab, minnatdorlik bildirdi, ayni paytda Toshkent shahrida yo‘l-transport infratuzilmasini rivojlantirish va optimallashtirish, mikromobillik uchun shart-sharoitlarni yaxshilash, qulay to‘xtash joylarini yaratish, yashil transport tarmog‘i qatnovini keng ko‘lamda joriy etishga qaratilgan qator dasturlar ishlab chiqilayotganini aytdi.
Uchrashuv yakunida tomonlar optimal yechimlarga erishish uchun muloqotni davom ettirishga kelishib oldi.
Izoh (0)