Наманганда Ўзбекистондаги энг баланд томоша чархпалаги ўрнатилди (видео)

Наманганда Ўзбекистондаги энг баланд томоша чархпалаги қад ростламоқда. Бу ҳақда “Дарё” мухбири Азизбек Абдувалиев хабар бермоқда.

Чархпалак Наманган шаҳридаги “Афсоналар водийси” боғида ўрнатилди.

“Боғимизга келаётган меҳмонлар, сайёҳларнинг талаб-истакларидан келиб чиқиб аттракционларимизни янгилаяпмиз, ўзгартиряпмиз. Аслида 2016 йили, боғимиз қурилиши пайти ҳам чархпалак ўрнатиш режада бўлган, фақат жойлашув манзили бошқа ерда эди. Туркия, Дубайдаги шу каби маҳобатли иншоотларни кўриб, ўрганиб, тажриба орттирдик. 2023 йил учинчи чорагида Хитойдан олиб келдик ва ўрнатишга киришдик. Ўзбекистонда шу пайтгача энг баланд томоша чархпалаги баландлиги 72 метр бўлган, бизники 20 метр юқори. Аслида бундан ҳам баландроқ бўлиши мумкин эди, лекин маҳаллий ландшафт хусусиятларидан келиб чиқдик”, — дейди “Наманган истиқлол боғи” МЧЖ директори ўринбосари Иброҳим Маматқулов.

Чархпалакнинг баландлиги 92 метр, жами 54 та кабинага эга. Бир пайтнинг ўзида 216 кишига хизмат кўрсатиши мумкин. Айланиш даври эса 20 дақиқадан кўпроқ.

Айтишларича, чархпалакнинг энг юқори нуқтасидан ҳатто қўшни Андижон томонларни ҳам кўриш мумкин бўлади.

“Ҳозирда қурилиш-монтаж ишлари якунланган, ободонлаштириш, чироқларни ўрнатиш қолди. Икки ҳафталардан сўнг булар ҳам тугаб, мутахассислар томонидан синовлар бошланади. Наврўз байрами арафасида барчага ажойиб совға бўлади деган умиддамиз. Кейин насиб Ҳайит айёми, халқаро Гуллар фестивалига уланиб кетади. Чархпалак ишга тушганидан сўнг кунига ўртача 10 минг меҳмон келишини кутяпмиз”, — дейди мутасадди.

Иброҳим Маматқуловнинг билдиришича, чархпалакни олиб келиб, ўрнатиш харажатлари ўртача 1 миллион долларни ташкил этган.

“Шу пайтгача 100 миллион доллардан ортиқ маблағ сарфланган боғда бундай муҳташам чархпалакнинг бўлиши табиий эди. Унга арзигулик ном бериш учун ички танлов ҳам эълон қилдик. Ўйлайманки, чархпалак Наманган шаҳрининг ўзига хос ташриф қоғозига айланиб қолади”, — дейди у.