HAMAS delegatsiyasi G‘azoda o‘t ochishni to‘xtatish bo‘yicha muzokaralar olib borish uchun Qohiraga keldi

Falastinning HAMAS harakati rahbariyatidan iborat delegatsiya Qohiraga yetib keldi. Bu haqida “TASS” xabar bermoqda.

Ma’lumotlarga ko‘ra, muzokaralarning navbatdagi bosqichi G‘azo sektorida o‘t ochishni to‘xtatish va Isroil qamoqxonalarida saqlanayotgan falastinliklar bilan garovga olinganlarni almashish bo‘yicha bo‘lib o‘tadi.

“HAMAS delegatsiyasi payshanba kuni ertalab Misr poytaxtiga o‘t ochishni to‘xtatish bo‘yicha muzokaralarni yakunlash uchun yetib keldi”, — deyiladi harakatning Telegram kanalida e’lon qilingan xabarda.

Avvalroq HAMAS harakati AQSH, Qatar va Misr vositachiligida ishlab chiqilgan G‘azoda o‘t ochishni to‘xtatish bo‘yicha 3 bosqichli Parij rejasini qo‘llab-quvvatlashi xabar qilingandi. 

HAMAS bu rejaga “ijobiy ruhda” munosabat bildirib, anklavda to‘liq o‘t ochishni to‘xtatish, asirlar va vafot etganlarning jasadlarini almashish va G‘azo sektorini tiklashni ma’qullagan.