Toshkent shahrida “Mahalla: yashil va xavfsiz hudud” mavzusida birinchi shaharsozlik forumi bo‘lib o‘tdi. Bu haqda “Daryo” muxbiri xabar berdi.
Tadbirda arxitektorlar, shaharsozlar, dizaynerlar, iqtisodchilar va boshqa qator sohalar vakillari ishtirok etdi.
Muloqotda o‘zbeklar hayotida mahallaning o‘rni, zamonaviy shaharsozlik rivojida nimalar muhimligi, inson va ekologiya uyg‘unligi masalalarida fikr almashildi.
Shaharsoz Temur Ahmedovning aytishicha, bugun mahallaning asl qiyofasi ham o‘zgarib bormoqda.
“Mahallani tarixiy jamaot bo‘limi desak bo‘ladi. Hozir shaharlarda baland binolar qurilyapti. Mahalladan ‘dom’larga ko‘chgan ko‘plab odamlar qo‘shnilarini, bir–birini bilmaydi. Tizim yo‘q. Kichikligimizda hamma qarindoshlar, qo‘shnilar bizga qarab turardi. Kattalar yoshlarga tarix, urf-odatlarni o‘rgatardi. Agar bunday muloqot bo‘lmasa, jamiyat ajralib ketadi. Shuning uchun bugungi asosiy mavzu mahalla, o‘z navbatida shaharlar qanday rivojlanayotgani, ekologiyamizning holati to‘g‘risida ham so‘z bordi. Afsuski, hozir ko‘p qavatli uylar bitta majmua sifatida qurilmayapti. Yaʼni tarar–joy hududi maktab, bog‘cha, pochta, do‘konlar va boshqa obyektlardan iborat kompleks bo‘lishi kerak. Mahalla aslida kichkina shahardek gap. Ota–ona bog‘chaga bolalarni olib borganda boshqalar bilan tanishadi. Odamlar o‘zaro muloqotda bo‘ladi. Hozir esa bunday muloqotlar uchun imkoniyat yo‘q”, — dedi mutaxassis.
Iqtisodchi Salimjon Bekmurodov shaharlarning vertikal o‘sishi yerdan optimal foydalanish imkonini yaratishini aytdi.
“Bunda shaharlarni ekologiyaga zarar yetkazmagan holda rivojlantirish mumkin bo‘ladi. Shu bilan birga, infratuzilmaga ketadigan xarajatlar ham qisqaradi. Qatnov vaqti ham qisqaradi. Aholining ijtimoiy jihatdan faolligini saqlab qolishga erishamiz. Oxirgi yillarda O‘zbekistonda qurilish ishlari jadallashdi. Buning evaziga Toshkent shahrida 2017–2022-yillarda eng ko‘p yashillik darajasi Olmazor (33 foiz), Shayxontohur (26 foiz), Yakkasaroy (23 foiz) va Mirzo Ulug‘bek (18 foiz) tumanlarida qisqargan. Buxoro shahrida esa yashillik 37 foizga qisqargan”, — dedi u.
Shaharsoz Otabek Murodov bunday forum mamlakatda birinchi marta o‘tkazilayotgani, shaharsozlik rivojlanishi uchun ekspertlarning muloqoti muhimligini aytdi.
“Forumda mahalla tanlanganiga sabab shaharlarning qurilishi va rivojlanishi mahalladan boshlanadi. Agar biz mahallani shakllantirishni to‘g‘ri yo‘naltirsak, hamma shahar va qishloqda yo‘nalish to‘g‘ri bo‘ladi. Maqsadimi turli sohadagi ekspertlarni jamlab, ularning fikrini inobatga olib, umumiy bir xulosa chiqarish edi”, — dedi mutaxassis.
Izoh (0)