Тошкент шаҳрида “Маҳалла: яшил ва хавфсиз ҳудуд” мавзусида биринчи шаҳарсозлик форуми бўлиб ўтди. Бу ҳақда “Дарё” мухбири хабар берди.
Тадбирда архитекторлар, шаҳарсозлар, дизайнерлар, иқтисодчилар ва бошқа қатор соҳалар вакиллари иштирок этди.
Мулоқотда ўзбеклар ҳаётида маҳалланинг ўрни, замонавий шаҳарсозлик ривожида нималар муҳимлиги, инсон ва экология уйғунлиги масалаларида фикр алмашилди.
Шаҳарсоз Темур Аҳмедовнинг айтишича, бугун маҳалланинг асл қиёфаси ҳам ўзгариб бормоқда.
“Маҳаллани тарихий жамаот бўлими десак бўлади. Ҳозир шаҳарларда баланд бинолар қуриляпти. Маҳалладан ‘дом’ларга кўчган кўплаб одамлар қўшниларини, бир–бирини билмайди. Тизим йўқ. Кичиклигимизда ҳамма қариндошлар, қўшнилар бизга қараб турарди. Катталар ёшларга тарих, урф-одатларни ўргатарди. Агар бундай мулоқот бўлмаса, жамият ажралиб кетади. Шунинг учун бугунги асосий мавзу маҳалла, ўз навбатида шаҳарлар қандай ривожланаётгани, экологиямизнинг ҳолати тўғрисида ҳам сўз борди. Афсуски, ҳозир кўп қаватли уйлар битта мажмуа сифатида қурилмаяпти. Яъни тарар–жой ҳудуди мактаб, боғча, почта, дўконлар ва бошқа объектлардан иборат комплекс бўлиши керак. Маҳалла аслида кичкина шаҳардек гап. Ота–она боғчага болаларни олиб борганда бошқалар билан танишади. Одамлар ўзаро мулоқотда бўлади. Ҳозир эса бундай мулоқотлар учун имконият йўқ”, — деди мутахассис.
Иқтисодчи Салимжон Бекмуродов шаҳарларнинг вертикал ўсиши ердан оптимал фойдаланиш имконини яратишини айтди.
“Бунда шаҳарларни экологияга зарар етказмаган ҳолда ривожлантириш мумкин бўлади. Шу билан бирга, инфратузилмага кетадиган харажатлар ҳам қисқаради. Қатнов вақти ҳам қисқаради. Аҳолининг ижтимоий жиҳатдан фаоллигини сақлаб қолишга эришамиз. Охирги йилларда Ўзбекистонда қурилиш ишлари жадаллашди. Бунинг эвазига Тошкент шаҳрида 2017–2022 йилларда энг кўп яшиллик даражаси Олмазор (33 фоиз), Шайхонтоҳур (26 фоиз), Яккасарой (23 фоиз) ва Мирзо Улуғбек (18 фоиз) туманларида қисқарган. Бухоро шаҳрида эса яшиллик 37 фоизга қисқарган”, — деди у.
Шаҳарсоз Отабек Муродов бундай форум мамлакатда биринчи марта ўтказилаётгани, шаҳарсозлик ривожланиши учун экспертларнинг мулоқоти муҳимлигини айтди.
“Форумда маҳалла танланганига сабаб шаҳарларнинг қурилиши ва ривожланиши маҳалладан бошланади. Агар биз маҳаллани шакллантиришни тўғри йўналтирсак, ҳамма шаҳар ва қишлоқда йўналиш тўғри бўлади. Мақсадими турли соҳадаги экспертларни жамлаб, уларнинг фикрини инобатга олиб, умумий бир хулоса чиқариш эди”, — деди мутахассис.
Изоҳ (0)