O‘zbekiston bosh konsuli Kamol Ikromov Birlashgan Arab Amirliklari Madaniyat vazirligining Dubaydagi boshqarmasi vakili Anvar G‘olam Mohamad Abdulloh bilan uchrashuv o‘tkazdi. Bu haqda “Dunyo” AA xabar berdi.
Maʼlum qilinishicha, muloqotda Birlashgan Arab Amirliklarida o‘zbek madaniyati markazlarini ochish, birgalikda madaniy tadbirlar tashkil etish, shuningdek, o‘zbek tilining xalqaro nufuzi va jozibadorligini oshirish masalalari ko‘rib chiqilgan. O‘zbekistonning turizm salohiyatini xorijiy mamlakatlarda, shu jumladan, BAAda keng targ‘ib qilish masalalariga alohida eʼtibor qaratilgan.
Anvar G‘olam Mohamad Abdulloh O‘zbekistonda kechayotgan o‘zgarishlarga yuqori baho berar ekan, erishilayotgan yutuqlar jahon hamjamiyati tomonidan eʼtirof etilayotganini taʼkidlagan. Uning aytishicha, O‘zbekiston va BAA o‘rtasidagi hamkorlik istiqbollari barcha sohalarda ulkan salohiyatga ega.
Suhbatdoshlar BAAdagi yirik kutubxonalar va taʼlim muassasalarida O‘zbekiston bo‘limlarini ochish va kelajakda o‘zbek tilini o‘qitish loyihasini yo‘lga qo‘yish imkoniyatlarini ham muhokama qilgan. Uchrashuv yakunida Bosh konsulxona tomonidan Birlashgan Arab Amirliklarining ilmiy markazlari, universitet va yirik kutubxonalari ilmiy bazasini boyitish maqsadida o‘zbek tilidagi adabiyotlar va o‘quv qo‘llanmalarini yetkazib berish bo‘yicha kelishuvga erishilgan.
Izoh (0)