Xorazm, Samarqand, Navoiy va Andijon viloyatlarida “valyutchiklar” ushlandi

Xorazm, Samarqand, Navoiy va Andijon viloyatlarida valyuta qimmatliklarini noqonuniy muomalaga kiritilishiga chek qo‘yildi. Bu haqda Bosh prokuratura huzuridagi departament xabar berdi.

Ma’lum qilinishicha, departamentning Xorazm viloyat boshqarmasi tomonidan IIB xodimlari bilan hamkorlikda Urganch shahrida tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan U.S. fuqaro M.Sh.dan jami 20 ming dollarni 248 million so‘mga sotib olgan vaqtida ushlanib, uning avtotransport vositasidan 15 ming dollar va 286,7 million so‘m ashyoviy dalil sifatida olingan.

Shu kabi, departamentning Narpay tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda valyuta ayirboshlash bilan shug‘ullanib kelgan T.X. jami 3,7 ming dollarni fuqaro S.D.ga 46,1 million so‘mga sotgan vaqtida ushlanib, uning yonidan 3,7 ming dollar va 19,4 million so‘m ashyoviy dalil sifatida olingan.

Departamentning Qiziltepa tuman bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan V.Q. va A.X. jami 3,7 ming dollarni fuqaro A.A.ga 46,2 million so‘mga sotgan vaqtida ashyoviy dalillar bilan ushlangan.

Departamentning Andijon viloyat boshqarmasi va IIB xodimlari hamkorligida o‘tkazilgan tezkor tadbirda valyuta ayirboshlash shug‘ullanib kelgan M.T. 3,5 ming dollarni fuqaro M.M.ga 43,5 million so‘mga sotgan vaqtida ushlanib, jami 5,5 ming dollar va 3,8 million so‘m ashyoviy dalil sifatida olingan.

Departamentning G‘ozg‘on shahar bo‘limi va IIB xodimlari hamkorligida o‘tkazilgan tezkor tadbirda valyuta ayirboshlash shug‘ullanib kelgan F.G. jami 3,2 ming dollarni fuqaro A.A.ga 39,8 million so‘mga sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.