Qozog‘iston respublikasi prezidenti administratsiyasi rahbari Oljas Bektenov bosh vazir etib tayinlandi. Bu haqda Tengrinews xabar berdi.
Uning nomzodini “Amanat” partiyasi taklif qilgan, respublika prezidenti Qosim-Jo‘mart To‘qayev ham uni qo‘llab-quvvatlagan. Qozog‘iston Xalq partiyasi va Sotsial-demokratlar Bektenov uchun ovoz berishda betaraf qolgan. “Ak jol” esa qo‘llab-quvvatlagan. Bektenovning nomzodini 69 nafar deputat ma’qullagan, 7 nafari betaraf qolgan.
“Oljas Abayevich Bektenov Qozog‘iston respublikasi bosh vaziri etib tayinlansin, u ilgari egallab turgan lavozimidan ozod qilinsin”, — deyiladi farmonda.
Bektenov ushbu lavozimda 2022-yil yanvaridan Vazirlar mahkamasini boshqarib kelgan Alixon Smoilov o‘rnini egalladi.
“Nomzodimni qo‘llab-quvvatlaganingiz uchun tashakkur, davlatimiz rahbari mamlakatimiz iqtisodiyotini rivojlantirish yo‘nalishida aniq topshiriqlar berdi, ular amalga oshiriladi. Buning uchun yangi iqtisodiy impuls berish, haqiqatdan ham tezkor va qatʼiy choralar ko‘rish zarur. Asosiy e’tibor sanoat, neft va boshqa muhim tarmoqlarga qaratiladi”, — dedi Bektenov parlament majlisida.
Yangi bosh vazir mahalliy ishlab chiqarishni rag‘batlantirishga e’tibor qaratishini ta’kidladi.
“Qozog‘istonda ishlab chiqarilayotgan mahsulotlar ulushini oshirish zarur, biz ofteyk-shartnomalar tizimini to‘liq yo‘lga qo‘yamiz. Asosiy vazifamiz — mahalliy biznesni qo‘llab-quvvatlash. Qishloq xo‘jaligi salohiyatidan samarali foydalanish muhim. Shuningdek, suv resurslari, energiya tejamkorligi, transport-logistika tarmog‘i bo‘yicha samarali ishlaymiz”, — deya qo‘shimcha qildi u.
Uning so‘zlariga ko‘ra, hukumat sun’iy intellekt va yangi texnologiyalardan foydalanishni kengaytirish niyatida.
“Qonun ustuvorligini ta’minlash bo‘yicha chora-tadbirlar va aholini o‘ylantirayotgan boshqa masalalar hamisha hukumat e’tiborida bo‘ladi. Hukumat mamlakatimiz manfaati yo‘lida ishlaydi”, — dedi Bektenov.
Izoh (0)